Omulamuzi wa Kkooti ya Buganda Road Gladys Kamasanyu awadde Munnansi wa Congo Bobs Mbaya Kabongo ekibonerezo kyakusibwa emyaka 7 lwakusangibwa n’enkusu 122 (African Grey Parrots) oluvannyuma lwokukiriza omusango.
Kabongo yakwatibwa nga 14-April-2022 ku kyalo Kibaya mu Bunagana Town Council mu Disitulikiti y’e Kisoro bwebamukwata n’enkusu zino nga yali aziggye mu Ggwanga eyomuliraano erya Democratic Republic of Congo okuziyingiza Yuganda ngatalina lukusa.
Yali azitadde mu bookisi bbiri ezembawo, Bannamateeka okuva mu Uganda Wild Life Authority nga bakulembeddwamu Kefa Ndeke basabye omulamuzi amusibe emyaka 16 nga bawakanya ekyamayisa ekiri mu tteeka.
Ndeke yasinzidde ku Kabongo okuba ng’omusango aguzizza omulundi gwe ogusooka ate natayonoona budde bwa Kkooti nakiriza omusango. Kabongo yasabye omulamuzi amusonyiwe kuba akyalina obudde obukyuusa ngazzeeyo mu bantu ngakyali mwana muto ku myaka 33.