Aba Famire ya Private Wilson Sabiiti ku kyalo Mubali, Kijura Town Council mu Disitulikiti y’e Kabarole bavuddeyo nebalajanira eggye lya UPDF okubawa omulambo gw’omuntu waabwe baguziike. Bano era basabye Gavumenti ebategeeze oba nga balina kyebalina okuwaayo okusobola okuweebwa omulambo gw’omwana waabwe.
Pte Sabiiti ku lwokubiri nga 2-May yakuba Minisita Rtd. Col. Charles Engola amasasi agamuttirawo n’oluvannyuma naye neyetta wabula okuva olwo tebalina kyebaali bawulidde kuva eri Gavumenti oba eggye lya UPDF ku bikwatagana mulambo gw’omwana waabwe.
Saidi Biryomumisho, ng’ono ye mukulu w’omugenzi agamba nti n’abantu abaali bazze okubaziikirako okuva ebweru wa Kabarole basazzeewo okuddayo mu maka gaabwe nga kati n’ekyokuliisa abakungubazi tebakirina.
Oliver Musiimenta, muto wa Sabiiti agamba nti abantu okuva olwokusato oluwedde bababuuza ddi lwebagenda okuziika nabo kyebatasobola kwanukula. Ono gamba nti Gavumenti ebabuulire oba nga bebalina okukima omulambo gwa muganda waabwe bajja kwesonda bagukime.