Tewali muntu yenna yazzeemu kubuzibwawo okuva lwetwava mu kalulu – DIGP Maj. Gen. Tumusiime

Omumyuuka w’omuduumizi wa Uganda Police Force Maj Gen. Geoffrey Tumusiime Kastigazi akubye bituli mu by’ekiwamba bantu ab’oludda oluvuganya byebagamba n’ategeeza nti abantu aboogerwako baakwatibwa mu biseera bya bululu era Poliisi yavaayo dda ne alipoota ennambulukufu ku nsonga eyo kyokka ab’oludda oluvuganya basigala bagikomyawo buli kadde nga bakikozesa okuzannya eby’obufuzi byabwe.

Okusinziira ku Maj Gen. Kastigazi okuva okulonda lwekwaggwa, tewali muntu yenna yali azzeemu kukwatibwa mu ngeri atategeerekeka nga ab’oludda oluvuganya bwebagamba.

Ono ayongerako nti wabula bwewanaabaawo obwetaavu bajja kuddamu bakole okunoonyereza bafulumye alipoota empya.

Kastigazi agamba bbo nga Poliisi beteefuteefu okukwatagana n’aboludda oluvuganya okuzuula abantu bebalumiriza okuwambibwa wabula ekisinga okubamalamu amaanyi, ab’oludda oluvuganya bamanyi okuleeta amannya g’abantu abo nga ebibakwatako sibirambulukufu bulungi.

Okusinziira ku Maj Gen. Kastigazi oluusi bamanyi n’okubawaako erinnya ly’omuntu limu lyokka mbu bbo bazuule gyali olwo nebasoberwa kubanga tosobola kunoonya muntu ga tomanyi bimukwatako mu bujjuvu.