Omumyuuka w’omwogezi wa Uganda Police Force owa Kampala Metropolitan Police Luke Owoyesigyire avuddeyo nategeeza nga Poliisi bweyatemezebwako nti waliwo ababbi abaali babagalidde ebisse mu Gayaza Trading Centre, Gayaza Ward, Kasangati Town Council, mu Disitulikiti y’e Wakiso. Poliisi bwetyo yayimbula basajja baayo okuva ku Kasangati Police Station abakola ekikwekweto nebakwata abantu 5 nga bano kuliko; Kawoya Charles 17, Sekubuge Akiram 23, Mwesigwa Enock 32, Sagara Denis 27, ne Mwanja Ivan 31. Wabula ye Nekesa Rachael 29 ng’ono mukyala wa Richard Mwesigwe omuduumizi w’ekibinja kino ye yadduka.
Poliisi yazuula ejjambiya 8 eziwagaddwa, ensuululu 6, sipanda 5, piki piki 2 UEF 094E Yamaha nga myuufu ne UEK 221S Bajaj boxer myuufu, ne bokisi erimu emisumaali.
Kyategeerekese nti bano baali bateekateeka kulumba bitundu by’e Namugongo. Okunoonyereza kukyagenda mu maaso okuli n’okwaza amayumba mwebabadde basula wamu n’okunoonya abo abadduse.