Omutaka akulira Ekika ky’e Ngo asisinkanye Munnamateeka Kavuma

Jjaja Muteesaasira Keeya Tendo Namuyimba, Omutaka akulira Ekika ky’e NGO, asisinkanye muzzukulu we Munnamateeka Derrick Kavuma, Ssaabasajja Kabaka gwe yasiimye akulire olukiiko olutaba ebibiina by’abavubuka ba Buganda olwa Buganda Youths Council nga Ssentebe w’alwo.

Jjaja Muteesaasira asibiridde muzzukulu we ono Kavuma entanda ey’okutuukiriza obulungi obuvunaanyizibwa obwamuweereddwa Ssaabasajja Kabaka awatali ku mutiiririra.

Ssentebe Derrick Kavuma yeyamye obutaswaza Bwakabaka, Omutaka, Ekika kye, n’abazadde abamuzaala era akakasizza nti agenda kuweereza n’obumalirivu, mu bwetoowaze era mu buntubulamu.

Derrick Kavuma awerekeddwako abavubuka okuva mu Kika ky’e NGO, abakulembeze b’abavubuka ku Lukiiko lw’Abavubuka n’abalala.