Kabaka si mulwadde muyi – Katikkiro

Katikkiro Charles Peter Mayiga; “Leero nga 18 Ssebaaseka 2024, tufunye ensisinkano ey’enjawulo mu Bulange ku nsonga enkulu ekwata ku Ssaabasajja Kabaka.

Ensisinkano eno ebaddemu Katikkiro, Olulyo Olulangira Abataka Abakulu Ab’obusolya ne Baminisita.

Tusaanye tujjukire nti Ssaabasajja ye Kitaffe era okukira ku bantu abalala bonna, Ssaabasajja talingirizibwa, amawulire agakwata ku bulamu bwe tegafulumizibwa mu ngeri eweebula kitiibwa kye nga Kabaka oba okutyoboola eddembe lye ery’obuntu.

Kyokka kikulu nnyo Obuganda okumanya nti Kabaka ssi mulwadde muyi era tali ku ndiri, awo nno tubeere bagumiikiriza era twongere okusabira Nnyinimu Katonda ayongere okumussuusa.”