Olwaleero GRAVITTY OMUTUJJU bwabadde ayimba ku kisaawe e Kololo asabye Pulezidenti Yoweri Kaguta Museveni okuwaayo ssente basobole okuzimba eddwaliro e Busaabala.

Omubaka Gorreth Namugga (Mawogola South) avuddeyo nasaba Obukulembeze bwa Palamenti bunnyonyole lwaki emotoka ezabadde ziteereddweyo okukozesebwa Akulira oludda oluwabula Gavumenti wamu n’Ababaka okugenda okulambula enguudo mu Kampala okulaba embeera mweziri lwaki zagiddwawo.

Big Eye StarBoss avuddeyo; “Eggwanga lituuse mu mbeera nti kati Eddwaliro omuntu alina kulibanja muntu ssekinoomu eyakeera neyekolera ssente ze, sso ssi Gavumenti gyetuwa emisolo! Emisolo gyetuwa giraga wa?”

Abakwasisa amateeka okuva mu Allied Health Professionals’ Council mu Disitulikiti y’e Wakiso bakoze ekikwekweto ku malwaliro agakola omulimu gwokujanjaba abantu nga tegalina layisinsi. Abasawo abawerako abatalina bisaanyizo bakwatiddwa mu kikwekweto kino.

Abafamire y’omugenzi Cecilia Barbara Atim Ogwal baleese muwala we, Rosemary Alwoc Ogwal okudda mu bigere bye, ng’omubaka omukyala owa Disitulikiti ye Dokolo wadde ono abadde awangaalira Bungereza naye bagamba nti asobola bulungi okutuukiriza ebiruubirirwa bya Maama we. Bano bagamba nti ono bamuyitiddemu dda ku bizibu by’ kitundu era mwetegefu okukolera abantu.
Wabula era bategeezezza nti babadde tebanasalawo ku kibiina ki mwagenda kuggira wadde Maama we abadde Munnakibiina kya Forum for Democratic Change.

Omwogezi wa Gavumenti Ofwono Opondo avuudeyo ku mukutu gwa X; “Oluvannyuma lwa Pulezidenti Yoweri Kaguta Museveni okuvaayo neyemulugunya ku X ngayagala bamunyonyole lwaki oluguudo lwa Mukono-Kisoga-Nkokonjeru-Jinja olwatongozebwa mu 2016/17 lwonooneka ku sipiidi etagambika. Uganda National Roads Authority – UNRA edduse misinde okuziba ebinnya ku luguudo lwa kiromita 68.”

Omulamuzi wa Kkooti ya Buganda Road Ronald Kayizzi asindise blogger Kibedi Ronald Cox 48, ku alimanda mu kkomera e Luzira okutuusa ku lwokutaano lwa wiiki eno lwokukola vidiyo ngavuma Maama ko ne muwala we. Ono avunaaniddwa emisango okuli Cyber Harassment wamu n’okutyoboola ekitiibwa ky’omukyala. Kigambibwa nti okuva omwaka gwa 2021 okutuusa nga 18-January-2024 Kibedi lweyakwatiddwa, ono ngali mu Kampala ngayita ku mukutu ggwe ogwa Face Book abadde ateekayo vidiyo nekigendererwa kyokulaba nti eyali muganzi we kko ne muwala we babiraba. Kigambibwa nti ono abadde ayita eyaliko muganzi we kko ne muwala we bamalaaya okutuusa lwebekubidde enduulu ku Poliisi ya CPS mu Kampala eyamukutte.

Omumyuuka wa Sipiika wa Palamenti Rt. Hon. Thomas Tayebwa alagidde Clerk wa Palamenti okusimuula mu Hansard ebigambo ebyogeddwa Omubaka wa Busia Municipality Geoffrey Macho ngalumiriza ekibiina kya National Unity Platform okusosola mu mawanga nga agamba nti mu bantu bekyakalonda okujjuza ebifo ku bukiiko bwa Palamenti obwoludda oluvuganya abenjawulo abasingako bava mu Buganda.

Minisita Omubeezi avunaanyizibwa ku by’Ensimbi Henry Musasizi, avuddeyo nasambajja ebyayogeddwa Ababaka nti Pulezidenti alina abakozi 1,757 n’emotoka 666 nga bino byonna bisaasanyizibwako ssente z’omuwi w’omusolo mpitirivu. Ono agamba nti sibuli nsimbi eziweebwa State House Uganda ne offiisi ya Pulezidenti nti ziriibwa Pulezidenti Yoweri Kaguta Museveni ng’omuntu.