Omumyuuka wa Sipiika, Thomas Tayebwa awaliriziddwa okuyimiriza olutuula lwa Palamenti okumala eddakiika 10 bamale okunoonya abakozi ba Palamenti abalina okuzannya akatambi akabaweereddwa akooleka engeri abebyokwerinda gyebatulugunyamu abawagizi ba National Unity Platform.

Akulira oludda oluwabula Gavumenti Mathias Mpuuga Nsamba avuddeyo nategeeza Palamenti nti omukunga wa Technical owa Palamenti gwebakwasizza akatambi akooleka engeri Uganda Police Force wamu nabebyokwerinda abalala gyebakwatamu abawagizi ba National Unity Platform nga yabadde alina okukazanyira Palamenti bwabuzeewo. Mpuuga agamba nti lino lyandiba ekkobaane okubalemesa okwoleka ebikolwa ebyekko.

Omubaka wa Kawempe North Munnakibiina kya National Unity Platform – NUP Muhammad Ssegiriinya aka Mr Updates olunaku olwaleero batabaganye ne Alex Waiswa Mufumbiro. Ssegiriinya yeebazizza nnyo Pulezidenti w’ekibiina Robert Kyagulanyi Ssentamu aka Bobi Wine wamu ne Ssaabawandiisi David Lewis Rubongoya olwokubataganya.

Omwogezi wa Uganda Police Force Fred Enanga akakasizza nti batandise omuyiggo gw’omusajja eyategerekeseeko erya Ssemwanga ng’ono agambibwa okugaba ebitereke mu kkanisa mu Disitulikiti y’e Butambala wabula ng’ebitereke bino byazuuliddwa nti byabadde bbomu. Enanga ategezeezza nti waliwo n’omuvubuka gwebakutte ku nsonga zino nga ono atemera mu gy’obukulu 21, era ayongeddeko nti basobodde okutegulula bbomu 2 ku zino wiiki ewedde mu masinzizo e Kibibi.

Minisita avunaanyizibwa ku nsonga z’ettaka, amayumba n’okuteekerateekera ebibuga Judith Nabakooba; “Nga tukyalondoola ensimbi za ‘Parish Development Model funds’, Abantu b’e Mubende bantegeezezza nti bbanka mu Greater Mubende zibasasuza ssente nga bagenze okuggyayo ensimbi z’emyooga. Nsuubira nti ssente zino ezibatemwako teri ziri mu mateeka. Abantu balina okufuna ssente zaabwe zonna eziri ku mpapula. Kino ngenda kukirondoola era mbasaba nti ffenna tulina kukolera wamu okulaba nti enkola eno evaamu ebibala.”