Poliisi yawaliriziddwa okukozesa amasasi wamu n’omukka ogubalagala mu Disitulikiti y’e Kole okugumbulula abatuuze ababadde bataamye obugo nga baagala okutta abantu babiri ababadde balowoozebwa okuba ababbi b’ente.
Daniel Okello ne Nelson Elum nga bombi batuuze b’e Alemi Trading Center mu Ayer Sub County bebakwatiddwa abatuuze mu Masaka Trading Center mu Disitulikiti y’e Kole nga boolekera Alebtong.
James Ojok, nga y’e Ssentebe w’ekyalo ky’e Abako, agamba nti bano basangiddwa n’ente ya Vincent Ananga omutuuze w’e Abako. Embeera yatabuse oluvannyuma lwa babiri bano okugezaako okudduka wabula abatuuze nebabakwata. Poliisi okuva e Alemi yazze mangu nnyo nebataasa.
Abatuuze bakunze banaabwe nebalumba Poliisi nga baagala babawe abasibe, akavuvungano kamaze eddakiika nga 30 era nga abasirikale okuva ku Kole Central Police Station bamaze kuyingira mu mbeera.
Abavubuka 2 okuli Solomon Ogwang ne Stella Acheng, bebakubiddwa amasasi nga kati bali mu ddwaliro lya Lira Regional Referral Hospital.