Omulimu gwokuzzaawo Amasiro gutuusu mu mitendera egisembayo

Omulimu gw’okuzzaawo Amasiro g’e Kasubi gutuuse ku mitendera egisembayo, Ssaabasajja musiimu n’omulimu ogukoleddwa.
Okuddaabiriza kabuyonjo, oluggya omusimbwa e motoka, okuyunga amasannyalaze mu buli kanyomero, okumaliriza ennyumba z’Abazaana, bye bimu ku bisigadde okutereezebwa olwo omulimu gw’okugaddaabiriza guggyibweko engalo.
Bw’abadde alambula omulimu guno ne Baminisita ba Kabaka ssaako abakiise mu lukiiko lwa Buganda naddala abatuula ku kakiiko k’ebyobuwangwa n’ennono, Katikkiro Charles Peter Mayiga agambye nti ebisembayo mu kuyoyota ennyumba byetaaga bwegendereza era omulimu okujjibwako engalo gulina okuba nga guwedde bulungi.
Yebazizza nnyo obugumiikiriza abantu ba Buganda bwe boolesezza nebataterebuka olw’obulumi bwe bayiseemu.
Mu kiseera kino abalambuzi, amasomero, n’Abantu ssekinnoomu bakkirizibwa okugenda okulambula amasiro gano oluvannyuma lwa UNESCO okugawanduukulula ku lukalala lw’ebifo by’obulambuzi ebiri mu katyabaga gyebuvuddeko.
Amasiro g’e Kasubi gayokebwa omuliro mu mwaka gwa 2010, era kaweefube w’okugazzaawo azze akolebwa mu ngeri ez’enjawulo omuli okusonda ettoffaali, olumuli n’endala.
#ffemmwemmweffe