Ddereeva wa Aponye akwatiddwa Poliisi

Moses Buyinza Isabirye, Ddereeva w’omugenzi Apollo Nyegamehe, aka Aponye, akuumirwa mu kaduukulu ka Uganda Police Force e Ntungamo ku bigambibwa nti yali avugisa ekimama.

Nyegamehe, yafiira mu kabenje akaagwa e Itojo ku luguudo lwa Ntungamo-Kabale wiiki ewedde.

Emotoka y’e ekika kya V8 Toyota Land Cruiser nnamba UBF 300Z netomeregana ne Fuso nnamba UAZ 767D. Aponye, mu motoka yalimu ne muganda we, wabula Buyinza eyafuna ebiwundu naddusibwa mu Ddwaliro lya Mbarara Regional Referral Hospital okufuna obujanjabi nti naye olwatereeramu Poliisi nemutwala mu kaduukulu.

Okusinziira ku Samson Kasasira, omwogezi wa Poliisi ow’ettunduttundu ly’e Rwizi, Buyinza yakwatibwa okuyamba kukunoonyereza okuzuula oba nga waliwo obulagajjavu obuyinza okuba nga bwebwaviirako akabenje kano.

Kasasira agamba nti aba Poliisi okuli abasirikale b’ebidduka, abanoonyereza ku buzzi bw’emisango wamu n’aba forensics baddayo mu kifo awagwa akabenje okukuŋŋaanya obujulizi era fayiro bagiweereza dda ewa Resident State Attorney okugitunulamu abawabule ku kirina okuddako.

Kasasira era agamba nti Poliisi ekola kyonna ekisoboka okukwata ddereeva wa Fuso eyali etisse obumonde, nti era basobodde dda okuzuula nannyini Fuso eno nga bamusaba ababuulire Ddereeva abayambeko mu kunoonyereza.

Alipoota ezasooka okuva mu Poliisi zaalaga nti akabenje kano kaava kukuvuga ndiima wamu n’obutabaawo bubonero bulabula.