Pulezidenti Museveni awagira ekya Police okukuba abantu emiggo

Pulezidenti Museveni asiimye eky’abaserikale ba Police okukozesa emiggo okukuba abantu ababa batandise ebikolwa ebyokwekalakaasa n’obumenyi bw’amateeka ate nebagezaako n’okulwanyisa abaserikale ba Police.

Okwogera bino yabadde aggulawo olusirika lwa ba Minisita n’abawandiisi ab’enkalakkalira mu zi Minisitule ezitali zimu ogubadde guyindira e Kyankwanzi ku ttendekero ly’obukukembeze, agamba nti kiba kigwanidde okubagolola ettumba wabula sikirungi kutwaliramu abo abatalina mutawaana.

“Ab’oludda oluvuganya Gavumenti bangi ba Cecilia Ogwal, ba Mao, aba UPC nga bbo tebeekalakaasa  naye Besigye talina mpisa ate mumenyi wa mateeka “ Museveni bw’agamba.

Wabula alambuludde obukodyo obulala Police bweyinza okukozesa okugumbulula a beekalakaasa omuli ; Okukuba Bbattuuni, okubafuuyira amazzi ate n’omukka ogubalagala.