Poliisi enoonya abateeberezebwa okuba nga begasse ku bayeekera ba ADF
Ebitongole by’ebyokwerinda ebirwanyisa ebikolwa eby’obutujju, bitandise muyiggo gw’abantu 16 abateeberezebwa okuba nga beegasse ku kibinja ky’abayekera ba ADF abali mu Democratic Republic of the Congo.
Okusinziira ku mwogezi wa Uganda Police Force SCP Fred Enanga agamba nti abantu bano abateeberezebwa okuba nga begasse ku ADF babadde babeera mu bitundu bye Kkonge – Lukuli mu Ggombolola ye Makindye mu Kampala.
Enanga akakasizza okubulawo kw’abantu bano naategeeza nti bano baabuzeewo n’abaana abali wakati w’emyaka 5-7 nga bateebereza okuba nga baabatutte mu buyeekera, naye bakola buli ekisoboka okulaba nga babazza kuno.
