Enanga alabudde Bobi Wine n’abawagizi be

Omwogezi wa Uganda Police Force SCP Fred Enanga yavuddeyo nawanjagira abawagizi ba National Unity Platform – NUP abavaayo mu bungi nebeyiwa ku nguudo olwo nebakola oluseregende olutambula empola nti kino kyabulabe eri bbo wamu n’omukulembeze wa NUP. Poliisi ebasabye okulaba nti bino byonna bikolebwa mu ngeri enuŋŋamu etali yabulabe olwo kisobozese Bannakibiina kya NUP okukozesa obulungi eddembe eribaweebwa Ssemateeka.

Poliisi egamba nti kino ekikola okutuukiriza obuvunaanyibwa bwayo obwokukuuma Bannayuganda wamu n’ebyabwe.

Enanga agamba nti okusinziira ku ngeri NUP kyekunga abantu baayo, okutambulira mu luseregende ate empola ennyo ekitaataganya ebyentambula, okukozesa abakuumi abatali batendeke, Robert Kyagulanyi Ssentamu aka Bobi Wine okuvaayo nalabikira waggulu w’emotoka wakati mu bantu abangi abamuwagira, abamwagaliza n’abalala kyemuteeka mu katyabaga kokulumbibwa abatujju.

Enanga agamba nti bakugenda mu maaso n’okuwa aba NUP obukuumi mu nkuŋŋaana zebanakuba mu Town Hall awali obukuumi eri abazze nga Poliisi esobola okubakebera obulungi. Ono abajjukizza okukolagana n’abakulira ebyokwerinda mu Disitulikiti gyebaba bagenze.