Emisomo gy’okulima emmwanyi mu Ssaza lye Bugerere gikomekkerezebbwa .

Ekitongole ky’Obwakabaka ekya BUCADEF kyateekateeka emisomo 5 mu Ssaza lye Bugerere mu Ggombolola ya Mumyuka Kayunga, Ssaabagabo Kayoza, Busaana, Mutuba II Nazigo, ne Musaale Kangulumira okuva nga 25th – 29th May, 2022 n’ekigendererwa eky’okutumbula ekirime ky’emmwanyi mu Buganda nga bayigiriza abantu ba Kabaka okulima emmwanyi ez’omulembe okuzifunamu ekiwera.

Oweek. Mariam Nkalubo Mayanja – Minisita w’Ettaka, Obulimi ne Bulungibwansi bwabadde aggalawo enteekateeka y’emisomo gino mu ggombolola ye Kangulumira akubirizza abantu ba Buganda obutakoowa kulima mmwanyi newankubadde waliwo okusomoozebwa okutali kumu. Mu ngeri yeemu abasabye okunyweza obusenze bwabwe ku ttaka nga bewandiisa mu kitongole kya Buganda Land Board.

Abamu ku basomeseza; Omuk. Charles Kironde – Ssenkulu wa Mwanyi Terimba Limited, Omw. Charles Ssekimuli – Omulimisa we Ssaza Bugerere, Omw. Ssekamwa John, n’Omuky. Harriat Namusisi – Omulimisa wa BUCADEF.

Omukolo guno gwetabiddwako Omumyuka Asooka n’Omumyuka Owookubiri owa Mugerere.