Sipiika Anita Among avuddeyo ku kkoligo eyamuteekeddwako Gavumenti ya Bungereza; “Nawulidde nti nina ebyobugagga bingi nnyo e Bungereza nti era nina ne akawunti mu bbanka z’e Bungereza nnyingi. Ekyenaku nti nakagenda e Bungereza omulundi gumu . Sirinaayo yadde ka kappa. Sisaaliddwa yadde, era bwebaba balowooza nti ninayo ebyobugagga babitwale byonna balabe oba navaayo nenemulugunya. Ne kapa nayo mugitwale.”
Omwogezi wa Poliisi y’ebidduka SP kananura Michael yavuddeyo nategeeza; “Ekitongole kya Poliisi y’ebidduka kyakutte emotoka 93 olunaku lweggulo ku Poliisi ezenjawulo nga; Wandegeya, Katwe, Kabalagala, Kajjansi, Kawempe, Jinja Road, Kiira Division, Kira Road ne CPS.
Emotoka ezakwatiddwa zibadde zirina obugombe bwa Poliisi mu bukyamu, ebitaala byawaggulu, amataala agakyuusiddwamu wamu n’okuvugira ku ludda lwebatalina kuvugirako. Ba ddereeva bagiddwako sitaatimenti era nga balindirira kusimbibwa mu Kkooti bavunaanibwe.
Ebikwekweto byakugedera ddala mu maaso okutuusa ng’emotoka zino zonna zikwatiddwa. Poliisi erabula abagoba b’ebidduka mwenna wamu ne bannannyini motoka ezirina ebintu ebyo waggulu mu bumenyi bw’amateeka okubiggyako mu bwangu nga tezinakwatibwa.”
Eyali RCC wa Lubaga eyawumuzzibwa Herbert Anderson Burora avuddeyo nalangirira ekibiina ekipya kyatuumye National Resistance Movement in Resistance ( NRM-IR) nategeeza nti kino kiwayi ekikutuse ku kibiina ekiri mu buyinza ekya National Resistance Movement – NRM okulwanyisa obuli bw’enguzi obuli mu Gavumenti ya NRM kuba ebadde mu buyinza kumpi emyaka 40 wansi w’obukulembeze bwa Yoweri Kaguta Museveni.
Omubaka Ibrahim Ssemujju Nganda (Kira Municipality) avuddeyo nategeeza nti State House Uganda yasabye ensimbi ezenyongereza obuwumbi 18 mu obukadde 500 nga za ‘Classified expenditure’ n’obuwubmbi obulala 2 mu obukadde 700 nga zino zamisaala. Ono agamba nti singa Palamenti enaaba eziyisizza kiba kitegeeza nti State House esaasanya obuwumbi 2 n’obukadde 100 buli lunaku so nga enguudo za Kampala ezadaabirizibwa mu mwaka gw’ebyensimbi gwegumu 2023/24 zaweebwa obukadde 86.
Ekibiina kya National Unity Platform olunaku olwaleero kitongozza omulimu gwokuddamu okuwandiisa Bannakibiina abapya ssaako naabo abakadde okusobola okuzza obuggya enkalala za Bannakibiina. Omukulembeze w’Ekibiina Robert Kyagulanyi Ssentamu aka Bobi Wine wamu ne Ssaabawandiisi David Lewis Rubongoya bebatongozza enteekateeka eno ku kitebe ky’Ekibiina ku Kavule e Makerere.
Sipiika wa Palamenti Nnaalongo Anitah Among; “Byonna byetusalawo wano mu Palamenti tubisalawo mu mutima mulungi. Naye bwetuwulira Bammemba nga boogera emboozi zamalwa mu Lukiiko lwa Baminisita nti waliwo abaweebwa enguzi wano, lwaki temujja nemubyogerera wano? Tukolera bantu ate nemudda eyo nemuwoza nti tugaana alipoota, tetulina kyetukola, bwetuba tetulina kyetukola muggaleewo Palamenti.”
Omubaka Shamim Malende era Munnamateeka wa Bannakibiina kya National Unity Platform abasimdikibwa mu Kkooti ewozesa bakkalintalo eya ICD (International Crimes Division) okuli; Magala Umar, Sekidde Hamidu, Muhammad Kalyango, Issa Makumbi, Male sulaiman, Kairugala Wilber, Katumba Abdu, Katumba Abdallah ne Muyodi Hamidu ategeezezza nti Kkooti tesobodde kuwulira kusaba kwabwe okwokweyimirirwa olwokuba oludda olwaabi lubadde terunetegeka bulungi nga lukyetaaga akadde. Kkooti etegeezezza nti yakuwulira okusaba kwabwe nga 20/5/2024.