Sheikh Kamoga akaligiddwa obulamu bwonna mu nkomyo

Kkooti enkulu mu Kampala ewozesa emisango gy’ensi yonna ekalize eyali akulira Abatabbuliiki,  Amir Ummar Sheikh Yunus Kamoga n’abalala basatu okumala emyaka gyabwe egisigadde egy’obulamu mu nkomyo oluvannyuma lw’okusingisibwa emisango gy’obutujju. 

Abalamuzi; Ezekiel Muhanguzi, Percy Tuhaise ne Jane Kiggundu bavumiridde ekya ba sseeka bano;  Sheikh Yunus Kamoga,Sheikh Multabh Bukenya, Sheikh Siraje Kawooya okudda mu bikolwa eby’obutujju songa amaayi gaabwe baaligamalidde mu bintu ebikulaakulanya wamu n’okugatta abantu bebakulembera.

Bwebabadde basalira bano ebibonerezo, n’abalala babiri abasaliddwa okusibwa emyaka 30, abalamuzi bagambye nti omusango guno gwa nnaggomola nga ebikolwa byagwo birina obulabe ku nsi yonna ku mbeera z’abantu ate ne ku butonde bw’ensi.