Kkooti eyolekedde okugoba ogwa Dr. Stella Nyanzi

Kkooti yooku luguudo Buganda etiisatiisizza okugoba emisango egivunaanibwa omusomesa w'e Makerere Dr. Stella Nnyanzi  egy'okuvvoola Pulezidenti Museveni ssinga butuuka ennaku z'omwezi 18 Mukutulansanja nga  Ssaabawaabi wa Gavumenti talaze kweyongerayo na misango gino.

Omulamuzi James Eremye ali mu mitambo gy'omusango guno yagwongezzaayo oluvannyuma lwa Nelly Asiku ayakiikirira Ssaabawaabi wa Gavumenti okutegeeza kkooti nti Ssaabawaabi yali tannaba kubaako ky'asalawo ku musango guno olw'okuba waaliwo akeediimo k'abalamuzi .  

Wabula ye Puliida wa Dr. Stella Nnyanzi,  Isaac Ssemakadde ategeezezza Kkooti nti Ssaabawaabi wa Gavumenti ayisa olugaayu mu nkola ya kkooti so nga Dr. Stella Nnyanzi abadde alabikako eri kkooti nga bwekyalagibwa,  naye okuva nga 27 Kasambula omwaka oguwedde tewali kiva wa Ssaabawaabi.