Hajji Muyanja Mbabaali,ssentebe wa NRM e Lwengo azzizzaayo empapula zokwesimbawo

Ekitebe ky’Akakiiko kebyokulonda mu kibiina kya NRM ku Kyaddondo Road mu Kampala,kyeyongeddemu ebbugumu nga ba memba abaagala okukwata bendera yaakyo mu kulonda okwa bonna bazzaayo empapula ze baatwala gye buvuddeko.
Bano baweebwa foomu olwokwetegekera okuvuganya mu kakungunta kekibiina okulondako abanaakwata bendera ya NRM ku mitendera gyobukulembeze egyenjawulo.
Olwaleero Hajji Muyanja Mbabaali,ssentebe wa NRM mu district y’e Lwengo mu Buddu azzizzaayo empapulaze mu ofiisi y’Akakiiko k’Ebyokulonda mu NRM,oluvannyuma n’ategeeza bannamawulire nti agenda kuvuganya ku kukwata bendera ku kifo kyomubaka mu palamenti ate avuganye ne ku bukulembeze bwa NRM mu Buganda.
Oluvannyuma ,omubaka omukyala owa district y’e Mpigi Nakawunde Sarah Temulanda,naye azzizzaayo empapula ze ate n’aweebwa endala.
Nakawunde Sarah Temulanda ategeezezza Radio Simba nti ayagala addemu akwate bendera ya NRM mu kalulu komwaka 2016 alyoke amalirize ebitawedde mu kisanja kya palamenti eyomwenda.
Nakawunde Temulanda agamba nti ayolekedde okuyitamu nga teri avuganya kuba mpaawo munna NRM mulala yaggyayo mpapula kumuvuganya mu kamyufu ka NRM.
Bya Waguma kisuule