Gen. Gutti awandiikidde CDF amuwabule ku kyokusonyiwa Kayihura
Kkooti y’amaggye e Makinye ewandiikidde Omuduumizi w’eggye lya
Uganda People’s Defence Forces – UPDF Gen. David Muhoozi nga bajjukiza obweyamo Pulezidenti Yoweri Kaguta Museveni bweyakola okulaba nti Gen. Edward Kale Kayihura asonyiyibwa.
Mu bbaluwa eyawandiikibwa nga 2-Feb-2021, Lt. Gen. Andrew Gutti Ssentebe wa Kkooti y’amaggye yawandiikidde CDF nga amwebuuzaako ku ki kyalina okuzzaako oluvannyuma lw’abantu abagamba nti bavudde Kisoro okumulumba ababuulire kiki kyakuzeewo ku bweyamo obwakolebwa Pulezidenti Museveni.
Pulezidenti Museveni bweyali anoonya akalulu e Kisoro nga 5-January-2021 abakulembeze okuva mu Disitulikiti Kayihura gyazaalwa nga bakulemberwamu Ssentebe wa LC5 Abel Bizimungu basaba Pulezidenti Museveni okusonyiwa omwana waabwe byeyamusobya. Abakulembeze abalala okuva mu Kibiina kya
National Resistance Movement – NRM
beyala ku ttaka ne Bizimungu okusaba Pulezidenti asonyiwe Kayihura nga bagamba yali musaale nnyo mu kunoonyeza ekibiina obululu mu kitundu.
Mukubaanukula Pulezidenti Museveni yasuubiza nti wakwogerako ne Kkooti y’amaggye balabe kyebayinza okumukolera.
