Poliisi ekitegeddeko nti wali abetegese okwekalakaasa
TUGENDA KUBAKWATA TUBASIBE;
Omumyuuka w’omwogezi wa Uganda Police Force owa Kampala Metropolitan Police ASP Luke Owoyesigyire avuddeyo; “Tufunye amawulire agesigika nti waliwo ekibinja kya Bannabyabufuzi abali ku ludda oluvuganya Gavumenti nga bategese okwekalakaasa n’okukola efujjo nga bonoona ebintu okwetoloola eggwanga lyonna nga batandikira mu Kampala n’emiriraano nga 9-3-2021.
Abategese okwekalakaasa kuno okutali mu mateeka bakunze abantu nga bakozesa ‘social media’ wamu n’okusuula ebipapula okuli ebiwandiiko okuli; “Time is Now. Join Nationalwide protests to fight for our victory.’ (Ekivuunulwa; Akadde kekano. Mutwegatteko mu kwekalakaasa okwetoloola eggwanga lyonna tubanje obuwanguzi bwaffe.) M7 Tajja Kulayira”.
Tuyungudde basajja baffe okwanganga ebikolwa bino ebitali mu mateeka.
Twagala okulabula abo bonna abategese ebikolwa bino ebimenya amateeka okubivaako. Poliisi tegenda kulonzalonza kubakwata okubatwala mu Kkooti bavunaanibwe.”
