Police etandise okunoonyerereza ku nfa y’omuyizi w’e Makerere

Police mu ssettendekero wa Makerere etandise omuyiggo n’okunoonyereza ku kiki  ekyaviiriddeko omuyizi wa ssettendekero ono ow’omwaka ogusooka nga asoma essomo ly’okulunda n’okujjanjaba ebisolo erimanyiddwa nga Vetinary Medicine okufa. 

Omulambo gw’omuyizi ono ategeerekese nga Kennedy Kaweesi, gwasangiddwa bweru wa University, kyokka nga abamumanyi bagamba nti abadde asula mu kisulo ekisangibwa mu Kikoni nga asoma lwaggulo.

Omuduumizi wa police era akulira eby’okwerinda mu ssetendekero wa Makerere, Jackson Mucunguzi, mukwogerako naffe, agambye nti omuvubuka ono yaaliba nga yawambibwa kyokka nga tebannaba kuzuula kyaviiriddeko nsonga eno.

Afande Mucunguzi era akakasizza nti batandise okubuuza n’okukwatagana n’abenyumba y’omugenzi Kaweesi, okuzuula oba omuyizi abadde yabategeezaako oba nga yali alinayo obukuubagano n’omuntu yenna.

Mucunguzi era alabudde abayizi ku ssetendekero okubeera abegendereza nga batambula naddala abo abasoma obudde obw’olweggulo olw’abakyala kimpadde abayinza okubatuusaako obulabe.