nze siwagira ffujjo – bobi wine
Omubaka wa Kyaddondo East Robert Kyagulanyi Ssentamu aka Bobi Wine; Nkitegeddeko nti ekibinja ky’abantu kyakungaanidde wabweru wa Leediyo nekirumbagana Dr. Kizza Besigye bweyabadde ava mu situdiyo. Bangi ku bano babadde bayimba People power. Kibi nnyo!
Ekisooka, nkiddingana lunye nti People Power si kisinde ky’abakozi baffujjo. Tetukiririza mukutulugunya yadde okukola effujjo ku muntu yenna. Njagala ntwala omukisa guno okutegeeza abawagizi baffe bonna okwetoloola eggwanga lyonna nti tetukiririza mu ffujjo yadde okutulugunya omuntu yenna wadde atuwagira oba tatuwagira.
Ekirala tukiririza mukwegattira awamu okusobola okuleetawo enkyuukakyuuka, era nga Dr. Kizza Besigye mpagi y’amaanyi nnyo mukuleetawo enkyuukyuka nga tuli wamu n’abasajja wamu n’abakazi abewaddeyo okununula eggwanga lino.
Newankubagadde wayinza okubaawo okwawukana mu bukodyo wamu n’enkola eziyinza okuyitwamu okuleetawo enkyuukakyuuka, tulina okuwa buli muntu ekitiibwa. Tetusobola kwerwana, ffenna tulina kuteeba mu ggoolo emu.
Kunsonga eno yennyini tukyagezaako okuzuula obukakafu n’obutuufu bw’ekintu kino ekyabaddewo, kuba bw’oba ozze ogoberera eby’obufuzi bya Yuganda okimanyi bulungi nti ebintu nga bino bibadde bitegekebwa Gavumenti wamu n’abantu abalala okutuukiriza ebigendererwa byabwe.
Ffe kyetulina okukola kwekugenda mu maaso nga tukolera wamu n’abantu abaagala enkyuukyuka mu ggwanga nga Dr. Besigye mwomutwalidde tusobole okutuuka ku buwanguzi. Tetujja kukiriza muntu yenna yadde ekintu kyonna okutujja ku mulamwa ku nsonga eno ey’omuzinzi gyetuliko.
#TutuvaKuMulamwa
