Naalinya w’amasiro g’e Kasubi awadde nsaleesale ku Muzibwazaalampanga.

Naalinya w’amasiro g’e Kasubi Beatrice Namikka awadde nsaleesale wa nnaku 5 zokka abazimba n’okuzzaawo amasiro ga ba Ssekabaka e Kasubi nga batadde akasolya ku Muzibwazaalampanga. Eno y’ennyumba enkulu omwagalamizibwa enjole za ba Ssekabaka bana nga yakwata omuliro mu mwaka gwa 2010 .

Naalinya ekiragiro akiyisizza leero e Kasubi ku mukolo Katikkiro Charles Peter Mayega waalambuliza obuganda omulimu guno wegutuuse. Naalinya agamba nti kino bwekirema okukolwa mu bbanga ly’abawadde  waakukunga abaganda bo beeteereko akasolya.