Muka Kitatta atutte Kayihura ne Gen. Muhoozi mu kkooti

Mukyala wa Abdullah Kitatta – Omuyima w'ekibiina kya Bodaboda 2010 akubye Ssaabaduumizi wa Police General Kale Kayihura wamu n'omuduumizi w'amagye g'eggwanga , General David Muhoozi mu kkooti enkulu ng'ayagala kkooti eragire bano okuleeta bba mu kkooti oba mufu oba mulamu avunaanibwe.

Sumayiya Ninsiima nga mutuuze mu zzooni ya Masannyalaze ekisangibwa mu Divizoni y'e Lubaga  agamba nti tamanyi mayitire ga bba nga kati ennaku ttaano ziyiseewo okuva lweyakwatibwa aba Police n'amagye okuva ku yafeesi ye esangibwa e Wakaliga  – Nateete 

Ninsiima agamba nti okukwatibwa kwa bba yakumanyira mu mawulire nga omumyuka w'omwogezi wa UPDF Lt. Col. Deo Akiiki akakasa nti Kitatta  akuumirwa Kireka era n'atuukayo abaserikale nebamugamba yeeyongereyo e Mbuya kuba baali tebamulina awo, agamba nti ate bweyatuuseeyo ne puliida we Joseph Kiryowa baabagambaye kuwandiika mabaluwa agasaba okusisinkana  Omuduumizi w'amagye, akulira CMI wamu n'akulira eby'amateeka mu UPDF

Nabwekityo Ninsiima ayagala kkooti eyingire mu nsonga eno eragire bba Kitatta aleetebwe mu kkooti aguulweko emisango bwegiba nga weegiri egimuvunaanwa .