Mariach gamumyukidde mu kkooti
Munnakatemba Charles Kasozi amanyiddwa nga MC Mariach ayimbuddwa Kkooti y’e Mengo ku musango gw’okukuba muserikale w’ebidduka. Bano basimbiddwa mu maaso g’omulamuzi Esther Nyandoi owa kkooti ya Nateete / Lubaga esangibwa e Mengo ne babasomera emisango ebiri okuli okukuba omuserikale n’okumulemesa okukola emirimu gye era bonna ne bagyegaana.
Mariach ne Bunjo nga bombi basabye kkooti beeyimirirwe era omulamuzi n’abalagira baleete abantu abayinza okubeeyimirira. Baaleese Andrew Benon Kibuuka akulira bannakatemba n’abayimbi okwabadde Emmanuel Serugo owa Emma promotions ne Ibrahim Kintu. Omulamuzi Nyadoi yabakkirizza okweyimirirwa n’abalagira okusasula emitwalo 50 ez’obuliwo ate ababeeyimiridde basasule obukadde 2 ezitali za buliwo.
Omusango yagwongeddeyo okutuusa nga August 3, 2018. Mariach baamusomedde n’emisango emirala okuli ogw’okuvugisa ekimama n’obutagondera biragiro bya muserikale wa tulafi ki.
