Loodi MeeyaLukwago asimattuse okukubwa aba Park Yard

Omuloodi wa Kampala Ssaalongo Erias Lukwago asimattuse okugwibwa mu bulago agavubuka ga kawuula,  ye wamu ne ba Kansala bwebabadde bagenze okulambula embeera eri ku katale ka Park Yard akazingiddwako Police enkya ya leero.

Bano okugenda mu katale kano kiddiridde Olukiiko olutudde olwaleero bonna okussa ekimu ng’enkuyege nebasalawo okugenda okulaba embeera eri mu Katale kano.

Omusasi waffe Nasser Kayanja abadde mu kifo kino atutegeezezza nti abantu abano olulabye oluseregende lw’emmotoka z’abakulembeze bano, ne basalako eya Lukwago ekireeseewo obweraliikirivu ku by’okwerinda bye era tayimiridde asigadde agenda mu maaso era bano nebamuwereekereza ebigambo ebimugoba okwamuka akatale.

Wabula oluvannyuma lwa Meeya okugenda ate abantu bano bakyukidde ne ba Kansala ababadde basigadde wabula Police eyanguye mangu okubataasa okuva mu kifo kino.