Gavumenti yenenyezebwa ku baana baffe abatulugunyizibwa ebweru – Sipiika

Sipiika Rebecca Alitwala Kadaga eby’okutulugunyizibwa kwa Bannayuganda abagenda ebweru ku kyeyo abitadde ku Gavumenti gy’alumiriza nti eremeddwa okussaawo enkola ennung’amu erondoola obulungi embeera abagendayo gye balina okukoleramu naddala emisaala n’essaawa bye balina okukolera.
Yagambye nti okuva mu Palamenti y’omunaana ababaka beesibye ku Gavumenti nga baagala erambulule emisaala n’embeera Bannayuganda abagenda ku kyeyo gye balina okukoleramu okugeza essaawa gye bakolera kyokka nga (Gavumenti ) ebaweta kikuubo.
Yabadde annyonnyola ku mirimu egyakakolebwa Palamenti ey’ekkumi eyatandika mu 2016. Ebuzaayo emyaka ng’ebiri n’ekitundu eyabuke. Yalabudde ababaka ba Palamenti obuteesiba ku bya kwetaba mu mikolo gya kuziika na kwabya nnyimbe kwokka wabula bawe obudde obusingako eri emirimu gya Palamenti emitongole gye balina okukola.
Yagambye nti ekimu ku bigenda okwongera okukuumira abawala mu masomero baleme kuwanduka kwe kuzimba amasomero ag’okumpi kibawonye okutambula ebbanga eddene nga bagenda okusoma.
Yategeezezza nti abavubuka balina okuwebwa obukugu ow’enjawulo basobole okufuna emirimu egy’okweyimirizaawo. Yagambye nti May 2019 w’anatuukira Palamenti ejja kuba emaze okuyisa amateeka nga 20 kyokka n’agamba nti etteeka erikwata ku nkyukakyuka mu by’obukulonda lirudde okuletebwa gavumenti