Avunaanyizibwa ku byenkulaakulana attiddwa – Kiruhura
Isaac Atwine, omu ku bavunaanyizibwa ku byenkulaakulana mu Disitulikiti y’e Kiruhura atirimbuddwa abantu abatannaba kutegeerekeka.
Omulambo gwe gusangiddwa okumpi n’amaka ge ku kyalo Rwemirinzi Cell ekiri mu Kateete Ward mu Divizoni y’e Nyamitanga mu Municipaali y’e Mbarara.
Atwine okuttibwa yabadde azze kulya nnaku nkulu n’abomu makaage. Yavudde mu makaage akawungeezi ka ggyo ssaawa nga bbiri ez’ekiro okugenda okugula ebyokulya mu kabuga akaliraanyeewo, wabula teyakomyewo.
Omwogezi wa Police mu kitundu ekyo Ibin Ssenkumbi ategeezezza nti omulambo gwe guzuuliddwa nga guliko ebiwundu ku mutwe ne mu kifuba era nga Police yabakanye dda n’ogwokunoonyereza.
