Abavubi basattira lwa kubakolamu kikwekweto – Mityana

Abakulira eby’obuvubi mu disitulukite ye Mityana bakoze ekikwekweto nebabowa obutimba obumenya amateeka g’ebyobuvubi ku myalo egiwerako ku nnyanja Wamala .

Ekikwekweto kino kikoleddwa ku myalo munaana (8) ne ku bizinga bibiri (2) okuli ; Nkona , Bukanaga , Butebi , Kalyankoko, Kimuli , Kyandaalo n’ewalala era nga obutimba obukwatiddwa bumannyiddwa nga  Kambamagi obutakkirizibwa .

Akulira eby’obuvubi e Mityana Elijah Ssenyojo agamba nti newankubadde nga bakola ebikwekweto bino naye obutimba buno obumenya amateeka buyingizibwa wano  mu ggwanga enkya n’eggulo .

Ekikwekweto kino kiggyidde  mu kiseera nga emyalo egiwerako ku nnyanja Wamala gyaggalwawo ab’ebyokuvuba olw’ebbula n’okukendeeera kw’ebyennyanja kyokka kino Elijah akitadde ku bavubi okukola omulimu guno gwokka ogw’okuvuba .