Abalamuzi balaajanira tteeka lya Bufumbo na kwawukana

Omulamuzi atuula e Soroti Justice Batema agamba nti olw’okubulwa kw’etteeka erirunngamya ebyobufumbo awamu n’okwawukana,  bo nga abalamuzi kibafuukidde kizibu nnyo okusalawo eggoye ku ngambana wakati w’abaagalana ababadde awamu mu bufumbo naddala nga ekyo ekibagugulanya bombi bakirinako obwa nannyini. 

Emyaka ebiri egiyise,  amyuka Ssentebe w’ekibiina kya NRM, Haji Moses Kigongo yaggulawo omusango mu kkooti ng’ayagala Omukyala Olive gwebabadde bonna okumala emyaka, ayamuke ennyumba ye eri ku kibanja nnamba 13 ku Kololo Hill Drive Kyokka omulamuzi mu kkooti enkulu ekola ku nsonga z’ettaka n’asalawo nti Olive asiigale mu nnyumba eyo awatali kutaataaganyizibwa.

Omulamuzi Godfrey Namundi yalamula nga ennyumba eno Haji Kigongo ne Olive bombi bwebagirinako obwannannyini era n’ayimiriza Haji Kigongo wamu ne ba Agents be obugobaganya Olive .