Offiisi ya Kaliisoliiso wa Gavumenti ekutte abakungu 6 okuva mu Office of the Prime Minister ku misango egyekuusa kukukozesa obubi offiisi wamu n’okubba ensimbi obuwumbi 8 ezaali ezokukola emirimu gyokuzza emirembe mu bitundu by’e Karamoja.
Abakwatiddwa kuliko; Geoffrey Sseremba (Under secretary/ Accounting Officer), Deogratious Masigazi (Undersecretary/ Head of Department Pacification and Development Programme), Joshua Abaho (Senior Assistant Secretary OPM), Barbra Asasira (Principal Assistant Commissioner Programmes), Emmy Tonny Ameny (Assistant Commissioner -Programmes), Peter Amodoi (Programmme Officer OPM), ne Samuel Ofungi (Senior Assistant Secretary OPM)
Bano batwaliddwa mu Kkooti evunaana abakenuzi n’abali b’enguzi.

Okuwulira Omusango oguvunaanibwa Omubeezi wa Minisita avunaanyizibwa ku nsonga z’e Karamoja Agnes Nandutu ogwokubba amabaati 2000 agaali agabantu abayinike e Karamoja kutandise olwaleero ku Kkooti ewozesa abakenuzi n’abali b’enguzi. Oludda oluwaabi lubadde lwetegese n’abajulizi 2 wabula Bannamateeka ba Nandutu okuli aba Alaka & Co. Advocates and Nandaah Wamukoota & Co. Advocates nga bakulembeddwamu Caleb Alaka bavuddeyo nebategeeza Kkooti nti baagala okuwulira omusango guno kuyimirirwe basooke balinde Kkooti etawulula enkayaana za Ssemateeka esooke ewulire ku kyomusango ogwaggulwa ku muntu waabwe ogw’okusangibwa n’ebintu ebiteeberezebwa okuba ebibbe kuba mugazi nnyo nga guleetawo n’emisango emirala 2 nti era tegwannyonyolwa bulungi nga Ssemateeka bwekirambika.
Alaka ategeezezza Omulamuzi Jane Okuo Kajuga nti yadde babamaze okuteekayo okwemulugunya kwabwe mu Kkooti etatulula enkayana za Ssemateeka nga bawakanya omusango guno, Kkooti nayo erina okwekeneenya obulungi omusango guno eveeyo n’ebibuuzo ebyayo.

Omwogezi wa Uganda Police Force Fred Enanga avuddeyo nategeeza nga bwebakyalindiridde ebiragiro okuva mu woofiisi ya Ssaavawaabu wa Gavumenti okumanya Minisita ki gwebaddako okukwata kwabo abenyigira mu mivuyo gy’amabaati g’e Karamoja agaali agabawejjere.

Ab’oluganda, abemikwano wamu n’Abawagizi b’Omubeezi wa Minisita avunaanyizibwa ku byokuteekerateekera Eggwanga Amos Lugoloobi bakedde kweyiwa ku Kkooti ewozesa abalyake n’abakenuzi e Kololo mu bungi nga balindirira omuntu waabwe okuleetebwa mu Kkooti okuwulira okusaba kwe okwokweyimirirwa. Ono avunaanibwa omusango gwokwezza agamu ku mabaati agaali ag’abantu abayinike ab’e Karamoja nga gasangibwa yagaseresa ebiyumba by’ebisolo bye ku ffaamu ye.