Moses Walyomu Muwanika eyakwatidde NRM bendera mu kalulu k’e ssaza ly’ e Kagoma mu disitulikiti y’ e Jinja yeddiza ekifo ky’omubaka mu Palamenti okukiikirira essaza lino (Kagoma) mu Lukiiko olukulu olw’eggwanga .

Walyomu alangiriddwa mu kiro ekikeesezza olwaleero Returning Officer wa Jinja, Rogers Sserunjogi nti afunye obululu 24257 mu kuvuganya okubadde okwakaasa mmeeme n’akalulu akaakuumiddwa obutiribiri.

Okuddamu okulonda kuno kwetabiddwamu abantu abawerako era nga baali baasaba kkooti esazeemu Walyomu ku nsonga ezikwatagana n’okugulirira abalonzi.

Alex Brandon Kintu yaakutte ekyokubiri mu kalulu kano bwabuuseeyo n’obululu 18490 olwo owa FDC Dr. Timothy Lusaka Batuwa n’afuna obululu 8149 ate olwo ye Mohammed Bidondole n’akoobeera n’obululu 1248. 

Oluvannyuma lwokulangirirwa, Walyomu abuulidde ab’amawulire nti agenda kutandikira awo wennyini weyasuubira nti enkulaakilana weggya okutandikira. 

Wabula  ye Brandon Kintu akutte ekyokubiri awakanyizza ebivudde mu kulonda era n’ategeeza nti akululu tekabadde ka mazima na bwenkanya era n’alangirira nga bwaddayo mu kkooti .

Abatuuze booku kyalo Kilalamba ekisangibwa mu ggombolola y’ e Kakooge mu Disitulikiti y’ e Nakasongola bavumbagidde Pasita nebamukuba ku Police y’ Nakasongola lwakulemera abamu ku bagoberezi be .

Abatuuze batutegeezezza nti Pasita Abbey Tumwesigye owa Kkanisa ya Holy Church of Christ abadde aliko abamu ku bagoberezi be omuli n’omuwala owa S.4 beyagaana okudda ewaabwe era nga abasuza mu kasenge kamu abantu musavu, abasajja mukaaga,omuwala omu nga abagamba  nti bwebaddayo ewaabwe baggya kufa .

Ssembooze Godfrey Ssaalongo nga ye Ssentebe w’ekyalo kino Kilalamba agamba nti Pasita ono bamufubutudde kubanga bakooye okubuzaabuza abantu .

Abatuuze mu bitundu by’ e Busia babuutikiddwa entiisa oluvannyuuma lw’omwana atemera mu gy’obukulu ena okulumbibwa enjuki ezimulumye nezimutwala ewa Ssenkaaba.

Omusasi waffe eruuyi eyo Waki Moses atutegeezezza nti Omwana ono Hatiti Deludani nga Mutabani wa Geoffrey Hatiti ku kyalo Shirika mu ggombolola y’e Sikuta mu Busia, bazadde be babadde bamulese awaka nga bagenze okuwenja akawogo, wabula bwafulumye okuzannya n’atanula okukasuka ejjinja mu muzinga gw’enjuki ewa mulirwana Bbanya Micheal era bwezityo enjuki nezimugwako ekiyiifuyiifu nezimuluma n’agwa wansi.

Wabula omu ku  bayise yaalabye omwana ono nga ali wansi ng’ayita banne okumuyambako nebamuyoolayoola era babadde tebannamutuusa mu ddwaliro n’assa ogw’enkomerero. Kitalo!

Abantu babiri bafiiriddewo mbulaga mu kabenje akagudde ku luguudo mwasanjala olwa Northern By – Pass nga waakayita ku nkulungo y’e Kisaasi ng’odda e Kyebando. (more…)

Nga okuwenja akalulu k’omubaka mu Palamenti ow’essaza ly’e Kagoma kukomekkerezeddwa akawungeezi ka leero, Dr.Kizza Besigye asinzidde  ku ssomero lya Butagaya Primary School e Kagoma n’asaba abalonzi okulonda munna FDC kubanga FDC yokka yeekyasobola okugatta Bannayuganda .

Besigye akkaatirizza nga Gavumenti ya NRM bwetalina kyeyali ekoze okuva lweyaggya mu buyinza nga n’emyaka egisoba mu 30 gyekwatidde enkasi eziise buziisi Yuganda n’ekamala bukamazi.

“Emyaka 31 buli omu yenna akaaba bwavu, mu malwaliro temuli ddagala, buli lunaku abakyala 19 bafa nga bazaala”.Dr. Kizza Besigye

Wabaddewo katemba atali musasulire ku Palamenti eggulo lya leero , Bannamawulire abagasakira ku Palamenti bwebatanudde emisinde nga bakkirira bwebambuka nga bawenja buseenene Ssaabaduumizi wa Police General Kale Kayihura abafuuwe ku ago agabadde mu kakiiko ka Palamenti akeekenneenya abo abaweereddwa Pulezidenti ebifo.

Mu Kakiiko kano Kayihura gyamaze essaawa eziwera ebbiri, bwavuddeyo bannamawulire ababadde bamulinze n’abatebuka olwo nebatandika okumuwenja obuseenene nga bwebakkirira ate nga bwebambuka olwo nebafuuka ekisekererwa nga buli omu yeebuuza kyebabadde .

Wabula oluvannyuma lw’okumuyiggira akaseera , bamaze nebamugwako era n’ayogerako gyebali era nga mu akaseera kano abadde yeeyita omugole abategeezezza nti tayinza kubannyonnyola kawonvu n’akagga ku bibaddeyo naye yeenyumiriza mu Police gyazimbye okumala emyaka kati 12.

Abayizi ku ssentendekero w’e Kabaale abagenda okunnyuka egyobukulembeze bakyeremeya okuwaayo yafeesi zaabwe eri abo abagenda okubaddira mu bigere nga bagamba nti baliko ensako yaabwe eri wakati w’emitwalo 60.000 ne 90.000 gyababanja, so tebasobola kuwaayo buyinza.

Bano bakulembeddwamu John Bosco Muhwezi era nga yaabadde akulira abayizi mu ssettendekero e Kabale nebeerema okuwaayo obuyinza eri abakulembeze b’abayizi abaggya nga bakukirwa Christina Tina Barigye abaalina okulayizibwa ku lwomukaaga .

Abakulembeze bano baabadde balina okukayizibwa Kakensa Ezra Twesigomwe Mishambi owa Kabale University era nga ono ye mumyuka wa Chancellor avunaanyizibwa ku byenjigiriza ku ssettendekero ono.

Wabula okuvannyuma lw’abayizi bano okwerema okuwaayo yafeesi zaabwe, baategeezezza nga bwebabanja emitwalo esatu esatu nga zaali za lutuula lwabwe nga waliwo n’endala emitwalo esatu egya Airtime ow’okukozesa emirimu gyabwe , nazo tebaazikubako kimunye.

John Bosco Muhwezi ng’ono yaanaatera okuwaayo obuyinza naye nga alemeddeko, agamba nti obutabawa ssente zaabwe kuba kubayisaamu ga ngege.!

Katikkiro wa Buganda Charles Peter Mayiga agugumbudde Police ne kkooti olwobunafu obuli mu misango gy’ebyettaka.

Katikkiro gamba nti Police eremererwa okunoonyereza ku misango gy’ettaka egiba giguddewo ate nga abantu basookera ku Police okwekubira enduulu.

” Police eremererwa okunoonyereza ku misango gy’ettaka ate nga abantu gyebasookera okwekubira enduulu, Kkooti okulamula emisango  yeesigama ku bujulizi obukungaayibwa Police, Police bweba n’obunafu mu kunooyereza ku misango, kkooti terina ngeri yonna gyejjakulamula misango egyo mu bwenkanya. Naye  ne mu kkooti mulimu obunafu, ku lunaku lwebaabawa musanga omulamuzi agenze mu lusirika n’olwekyo emisango gy’ettaka gyetuuma . N’olwekyo obunafu bwa Police mu okunoonyereza n’okukungaanya obujulizi mu misango gy’ettaka bwebuleeta emirerembe okugenda mu maaso n’obunafu bwa kkooti”.

Katikkiro okwogera bino abadde mu Lukiiko lwa Buganda mu Bulange e Mengo .