Police e Kapchorwa egombyemu obwala omusajja asangiddwa n’ennyama y’enkima ekikontana n’amateeka agafuga ebisolo byomu nsiko.

Omwogezi wa Police mu kitundu kino nga ye Rogers Tayitika agamba nti akwatiddwa ye Nicholas Wabololo myaka 20 era nga mutuuze wooku kyalo Mabale ekisangibwa mu ggombolola y’e Batila mu Disitulikiti y’e Bulambuli

Ssaabaduumizi wa Police mu ggwanga General  Kale Kayihura aliko enkyukakyuka z’akoze  mu kitongole kya Police. 

Assistant Inspector General of Police Abaas Byakagaba alondeddwa nga kati y’akulira abakozi mu kitongole kya Police ng’azze ku  buvunaanyizibwa obulala Afande Felix Kaweesi bweyali addukanya  eyattibwa mu gwokusatu gw’omwaka guno

Kayihura bino abirangiridde mu bubaka bweyayisizza ku nkomerero ya ssabbiiti gyetwakakuba amabega era nga mu bubaka bwebumu General Kale Kayihura  alonze Afande Moses Kafeero okuddira Byakagaba mu bigere ng’aduumira ettendekero erikuuma ba Ofiisa ab’okuntikko eriri e Bwebajja. Kafeero abadde mu ggwanga lya Rwanda gy’abadde mu kutendekebwa. N’enkyukakyuka endala mu ba Ofiisa ba Police abalala zikoleddwa.

Waliwo ekibinja ky’abawagizi ba NRM abavuddeyo n’enteekateeka eya Tutereeze mu kawaayiro aka 102 (b)  mu Ssemateeka w’eggwanga akaluubirira okuggyawo ekkomo ku myaka gy’omukulembeze w’eggwanga.

Ekibinja  kino nga kikulembeddwamu ssaabakunzi mu Kibiina kya NRM Faridah Mayanja,  era nga bakungaanidde ku ssomero lya Nakivubo Blue mu kibuga Kampala,  bagamba nti Pulezidenti Museveni agende mu maaso n’okukulembera eggwanga kubanga alifuze bulungi.

Enteekateeka eno ejjidde mu kiseera nga ab’ekibiina kya DP baavaayo n’enteekateeka gyebaatuuma K’ogikwatako nga basimbira ekkuuli eky’ennongoosereza mu bbago lino.

 Ettabi lya Nakumatt ery’e Mbarala liggaddewo olwamabanja g’obupangisa ku kizimbe okusukka ogwobulamuzi nga kati gatuuse mu ssiringi za Yuganda obuwumbi bubiri. 

Ssemaduuka wa Nakumatt ono abadde ku kizimbe ekiyitibwa Mpororo ekisangibwa mu luguudo Buremba mu Divizoni y’e Kamukuzi mu Munisipaali y’e Mbarara.

Ekizimbe kino kya Minisita omubeezi  ow’ebyokwerinda n’abaazirwanako  , Hon. Bright Rwamirama .

Kinajjukirwa nti Nakumatt eggaddewo amatabi gaayo asatu omuli eribadde ku Acacia Mall e Kololo,  eryoku Village Mall e Bugoloobi ne
Nakumatt e  Ntebe

Brigadier Kasirye Ggwanga avuddeyo n’asoomooza abo bonna abagamba nti balina ebiwandiiko ebituufu ku ttaka ly’e Lubowa babireete. 

Kino kijjidde mu kiseera nga Ggwanga aliko emmotoka Weetiiye gyeyateekera omuliro mu ssabbiiti ewedde  nga yali ereeteddwa okusenda ku ttaka lye.

Kasirye ategeezezza nti tagenda kukkiriza muntu yenna kuzannyira ku ttaka lye kubanga ettaka lyafuuse akataka  era n’alabula n’abo abeenyigira mu kubba ettaka nti bubakeeredde .

Loodi Meeya wa Kampala Ssaalongo Erias Lukwago agamba nti agenda kulekera awo okutuuza enkiiko za kkanso okuggyako nga ebiteeso enkiiko zino byeziyisa bitwalibwa nga ensonga era nebiteekebwa mu nkola. 

Lukwago bino yabyogeredde mu lutuula lwa kkanso eggulo olwabadde lutudde okuteesa ku nsonga ez’okulaba oba nga abaserikale aba KCCA abagambibwa okuba nga bakwasisa amatateeka oba nga kyebagenda okukola kiri mu mateeka.

Loodi Meeya alaze obwennyamivu obwa kkanso eno obutassibwamu kitiibwa nebyebateesa okulekebwawo ettayo n’agamba nti kino kibafuula abataliiko kyebagasa.

Ekikangabwa kibuutikidde Famire emu e Kyankwanzi abaana bataano bonna bwebasirikkidde mu nabbambula w’omuliro akutte ennyumba mwebabadde beebase mu kiro ekikeesezza leero.

Entiisa eno egudde ku kyalo Bukwiri ekisangibwa mu ttawuni kkanso y’e Butemba ekiri mu Disitulikiti y’e Kyankwanzi era nga abaana abafudde be; Hassan (12), Kamiat (08), Akram(07), Amuda (05), ne Farid Kakungulu nga bazadde baabwe be  Fahad Kakungulu ne Nalubega Hasifah.

Omusasi waffe Fred Mugema e Kyankwanzi atutegeezezzzanti Taata w’abaana bano agambye nti mu kiseera abaana bano webajjiiridde yabadde agenzeeeko mu ka tawuni okubaako byagulayo songa ne nnyabwe abadde yagenze kuziika e Mbale. Kitalo !!

Wabaddewo katemba mu nkambi ya Police e Iganga ng’abakyala b’abaserikale bagwa ekiyiifuyiifu ku bakozi ba UMEME okuva e Iganga nebabakuba nga babatangira okubateeramu bu mmita bwa Yaka mu nnyumba zaabwe. 

Abakazi bano bavumbagidde abakozi ba UMEME nebabalindiggula eri era nebabakkakkanako nebakuba nga mwotwalidde n’okwonoona bu mmita bwebabadde baleese okukozesa . Abakyala bano bagamba nti tebasoose kusomesebwa ku nkozesa ya Yaka so nga ate ne ba bbaabwe beeyaguza luggyo.

Ekikangabwa kibuutikidde abatuuze mu ttawuni kkanso y’e Buvuma ekisangibwa mu Disitulikiti y’e Buvuma, omusajja Sam Wanyange ow’emyaka 35 bw’akubye mukazi we Miria Mbeiza ow’emyaka 30 akakumbi n’amuttirawo.

Abeerabiddeko n’agaabwe bagamba nti baawulidde oluyombo wakati w’abafumbo bano ekiro ekikeesezza olwaleero nebalowooza nti lukomye awo, wabula kibabuuseeko bwebagenze okulaba nga Wanyange yasse mukyala we era n’amalamu omusulo nga omulambo yagulese mu nju n’abaana babiri, ow’emyaka 3 ne 6 .  Kitalo !