Omulangira Nakibinge olunaku olwaleero atemye evvuunike okuzimba ekizimbe e Kibuli
Uganda Muslim Education Association (UMEA) olunaku olwaleero ewadde Kkampuni ya VCON kkontulakita y’okuzimba ennyumba ezisulwamu wamu ne ssemadduuka okuva mu kkampuni 14 ezaali zisabye okukola omulimu guno.
Pulojekiti eno ebalirirwamu obuwumbi bw’ensimbi za Yuganda 38 yakubeeramu ennyumba ezipangisibwa wamu n’amadduuka amanene ddala e Kibuli ku bugazi bwa yiika 5 nga ettaka lino lyaweebwayo.
Pulojekiti eno eteereddwamu ssente IsDB Bank, okuva e Saudi Arabia nga yakulondoolwa Dolsar Limited. Rajiv Ruparelia nga ye Managing Director wa Ruparelia Group ku mukolo gw’okutema evvuunike avuddeyo nasiimba Omulangira Kasiim Nakibinge wamu n’abakulembeze ba Uganda Muslim Education Association (UMEA) olwokubasaamu obwesige nebabalonda era nasuubiza nti Kkumpuni yaabwe eya VCON yakukola omulimu oguli ku mutindo.
VCON yakukolera wamu ne Kkampuni ya Ambitious Construction Ltd okuzimba ebizimbe bibiri wamu n’ekifo webayinza okukolera bizineesi.
Omulangira Nakibinge yawaayo ettaka eriweza yiika 5 bazimbeko ebizimbe bino nga Pulojekiti okuggwa yakutwala omwaka mulamba era yakuganyula abantu bonna naddala ab’e Kibuli.
Ye Omulangira Kassim Nakibinge bwabadde ayogerako eri Bannamawulire ayozayozezza Ruparelia Group olwokuwangula ttenda era nabasaba okukola omulimu oguli ku mutindo. Asiimye nnyo aba ssente IsDB Bank, okuva e Saudi Arabia olwokuteekamu ensimbi.
