Omubaka Kabaziguruka agabudde Eid
Omubaka mu Palamenti owa Nakawa Michael Kabaziguruka nga kati ali mu kabula muliro agabudde ebirabo bya Eid egenda okubaawo enkya ku lwokusatu eri abalonzi be mu mizikiti nga emizikiti egisoba mu kkumi buli gumu gufunye ensawo y’omuceere, ebbaasa ne bbokisi z’amazzi.
Ng’awaayo obubaka bwa omubaka Kabaziguruka eri abayisiraamu , Kansala omukyala owa Nakawa ii Happy Nasasira abasabye nga bamalako omwezi omutukuvu ogwa Ramadan basabire nnyo Dr. Kizza Besigye n’omubaka waabwe basobole okuvvuunuka akaseera akaakazigizigi kebalimu .
Nasasira agamba nti omubaka waabwe ali nabo mu mwoyo newankubadde nga tebasobola kumulaba .
Emizikiti egifunye ebirabo bino mulimu ogw’e Banda, Kimeze Luzira , Portbell, Kitintale Mutungo Parish,Kyanja, Bukoto ne Ntinda .
Wabula akubirizza abayisiraamu okuyimirirawo ku magulu gaabwe okuvumirira obutali bwenkanya obuli mu ggwanga .
