gavumenti eveeyo evunaane abenyigira mukusengula abantu e Lusanja

Palamenti eragidde Gavumenti eriyirire bunnambiro abatuuze b’e Lusanja abaasengulwa ku ttaka mu bukyamu era evunaane n’abantu bonna abaali emabega w’ekikolwa kino.
Omubaka Mathias Mpuuga Nsamba (wa Masaka Munisipaali) yaleese ekiteeso mu lutuula n’alambika ebintu musanvu ebirina okukolebwa era ne biyisibwa Palamenti. Abatuuze abasukka mu 350 abaamenyerwa amayumba agawera 160 balina okuliyirirwa bunnambiro. Abantu bonna abaali emabega w’ekikolwa kino bavunaanibwe n’okukakasa nti abatuuze baweebwa eby’okusula, emmere n’ebintu ebirala ebyeyambisibwa mu bulamu obwabulijjo. Gavumenti era yalagiddwa okutegeeza ababaka w’enaaba etuuse ku ky’okussa mu nkola ebyasaliddwaawo mu lutuula olunaasooka nga Palamenti ezzeemu mu January.
Ebirala ebyalagiddwa Gavumenti mulimu okugoberera amateeka gonna agakwata ku ttaka, okunoonyereza ku nsonga zonna endala ez’ettaka n’okubangula abantu ensonga z’ettaka.