FDC eteekateeka kwaniriza Dr. Besigye mu kitiibwa

Ekibiina ekya FDC kigamba nti kiri mu nteekateeka ey’okufuba okulaba nga baaniriza Col. Dr. Kizza Besigye mu kitiibwa, eyaliko omukulembeze w’ekibiina agenda okudda mu ggwanga nga ennaku z’omwezi 29 omwezi guno ogwa Mutunda oluvannyuma lw’okugendako mu ggwanga ery’America awamu ne Bulaaya ku mirimu emitongole .

Bw’abadde ayogerako ne bannamawulire  ku kitebe ky’ekibiina ekisangibwa e Najjanankumbi mu Kampala , omu ku bakulembera ekibiina kino Phillip Wafula Ogutu,  agamba nti kino kijjidde mu kiseera nga abawagizi ba Dr. Besigye bamusabye okugenda ku kisaawe ky’ennyonyi e Ntebe okumwaniriza ng’ akomawo .

Phillip Wafula Ogutu agamba nti okukyala kwa Dr. Kizza Besigye mu mawanga g’ebweru omuli America n’amawanga ga Bulaaya asobodde okusisinkana bannabyabufuzi ab’enjawulo okuva mu mawanga gano, ne bateesa ku nsonga ez’enjawulo ezikwata ku nkulaakulana y’eggwanga .