Abakozi ba Bbanka Enkulu batwaliddwa mu kkooti
Omuwaabi wa Gavumenti Mike J Chibita asindise abakozi ba Bbanka enkulu mu kkooti evunaana abali b’enguzi n’abakenuzi bavunaanibwe emisango ebiri okuli okukozesa obubi offiisi zaabwe wamu n’okulya enguzi nga gino bagizza nga 26-April-2019 wakati wa France, Belgium n’ekisaawe Ky’ennyonyi Entebe.
Kakeeto Francis 36, nga mutuuze w’e Nabuti mu Disitulikiti y’e Mukono nga akola nga Branch Manager owa Bbanka enkulu wamu ne Wanyama Fred Vito 42 nga mutuuze w’e Baagazi Seeta Mukono nga akola nga Ass. Branch Manager bebavunaanibwa olw’okulemererwa okutuukiriza omulimu ogwabakwasibwa ogw’okwekebejja ebitereke ebyali bikubiddwa e France bireetebwe mu Yuganda ku nnyonyi eyali epangisiddwa okukola ogwo wabula ate bbo nebekobaana n’abalala nebakiriza okutikka ebitereke ebirala eby’abantu ssekinoomu ku nnyonyi.
