Uganda Police Force yetondedde Obwakabaka olw’okukuba teargas mu mukolo gw’Ekika ky’Embogo e Mugulu Ssingo.

Avunaanyizibwa ku by’obufuzi n’omuntu wa bulijjo Afande Hassan Kasingye yakulembeddemu ekibinja ekisisinkanye Katikkiro Charles Peter Mayiga ku Bulange.

Basabye Obwakabaka bubasonyiwe kwebyo ebyaliwo era basuubizza okubonereza omusirikale eyaduumira ekikolwa ky’okukuba omukka ogubalagala mu bantu abaali bakungaanye okwebaza Katonda olw’obuweereza bw’omutaka Kayiira Gajuule bweyamala nga yemukubiriza w’olukiiko lwa Bajjaja Abataka.

Katikkiro alaze obwennyamivu olw’ebikolwa bya Poliisi ebityoboola eddembe ly’obuntu ebyeyongedde ensangi zino. Asabye abasirikale abeetaba mu kikolwa kino babonerezebwe.