Prof. Jimmy Spire Ssentongo aka Spire Cartoons avuddeyo nayambalira RCC wa Rubaga Burora Herbert Anderson; “Ssebo, buli lukya nsaasira obulago wamu n’ebibegaabega byo ebirina omutawaana gwokusitula obuzito bw’omutwe gwo ogutalina kyeguyamba buli lunaku!”

Omulamuzi wa Kkooti Enkulu e Mukono David Matovu asindise Dr. Mathew Kirabo eyasingisibwa omusango gw’okutemula muganzi we Desire Mirembe ku alimanda mu Luzira Upper Prison ngalindirira okumusomera ekibonerezo kye kuba omusango gwasalibwa ngayadduka mu Ggwanga.

Katikkiro Charles Peter Mayiga akomyewo okuva ku lugendo lw’abaddeko e Saudi Arabia awabadde olukiiko lwa UNESCO omwavudde ebibala by’okuggya Amasiro ge Kasubi ku lukalala lw’ebifo eby’enkizo ebiri mu katyabaga. Asuubizza nti amasiro gaakuteekebwamu ebifo awatundibwa emmere eyaffe eyaakuno.

Ssaabalabirizi w’ekkanisa ya Seventh Day Adventist mu Ggwanga Omusumba Dr. Moses Maka Ndimukika yasiimye empeereza eyenkulaakulana Radio Simba gyetuusa ku Bannayuganda wamu n’enkolagana ennungi wakati waayo n’ekkanisa y’Abadiventi kwossa n’okwebaza Katonda olw’emyaka 25 Simba gyewezezza. Bino yabyogedde olunaku lw’eggulo bweyakyaddeeko ku Simba nasisinkana abagikulembera nebakubaganya ebirowoozo ku nsonga ez’enjawulo wamu n’okunyweza enkolagano wakati wa Radio Simba n’ekkanisa y’Abadiventi. Ye General Manager wa Radio Simba Mw. Collin Mutambo mu bigambo bye yateegezezza nti okukyala kwa Ssaabalabirizi kabonero akongera amaanyi mu mirimu gya Simba eri Eggwanga ne Nsi yonna.

Akulira oludda oluwabula Gavumenti Hon. Mathias Mpuuga Nsamba agamba nti oluvannyuma lw’omukulembeze wa National Unity Platform Robert Kyagulanyi Ssentamu aka Bobi Wine okuwummulamu wiiki 2 wakuddamu okutalaaga eggwanga nga ne Masaka wakutuukayo. Mpuuga yasabye abantu obutawubisibwa kiragiro kya Uganda Police Force kyagamba nti tekiri mu mateeka nti era NUP yakugenda mu maaso n’okukola emirimu gyaayo nga bweyakirambika.

Olwaleero lunaku lwamazaalibwa ga Pulezidenti Yoweri Kaguta Museveni, ono yazaalibwa nga 15-September, 1944 era awezezza emyaka 79. Mwenna abazaalibwa ku lunaku lwerumu naye tubaagaliza olunaku lw’amazaalibwa olulungi.

Omubaka wa Kawempe North Munnakibiina kya National Unity Platform Hon. Ssegiriinya Muhammad aka Mr Updates akubye ku matu nasiibulwa okuva mu Ddwaliro mu kibuga Amsterdam, Netherlands. Ono asiimye nnyo abawagizi ba NUP mu Netherlands abakoze ekisoboka okulaba nti afuna obujanjabi.