Minisita avunaanyizibwa ku nsonga z’omunda mu Ggwanga Maj. Gen. Kahinda Otafiire avuddeyo nakalataira Ssaabadduumizi wa Uganda Police Force omuggya IGP Abas Byakagaba obutasaawo ntalo na bannabyafuuzi abali ku ludda oluvuganya Gavumenti wabula abakwate mu ngeri amateeka gyegamulambikamu bwewaba nga waliwo ebitatambula bulungi.

Minisita omubeezi owettaka avunaanyizibwa ku nsonga zamayumba Persis Namuganza asekeredde ba Kkaminsona ba Palamenti olw’okukemererwa okuyimirira ku bigambo byabwe eby’okulwanirira abantu, ne batuuka okwegabanya ensimbi y’omuwi w’omusolo bwebeewa akasiimo ngate be bamu ku baakulemberamu enteekateeka y’okumuggyamu obwesiga ku kifo ky’obwa minisita omwaka oguwedde.

Bino Minisita Namuganza abyogedde bwabadde assa omukono ku kiwandiiko ekiggya obwesige mu ba Kkaminsona ba Palamenti abana(4) okuli; Solomon Silwany @National Resistance Movement – NRM, Prossy Akampurira(NRM), Afoyochan Easter (NRM), ne Mathias Mpuuga Nsamba(NUP) nga balangibwa okwegabanya ensimbi ezisoba mu kawumbi kalamba ne kitundu nga akasiimo.

Minisita Namuganza ategeezezza nga ye bweyagibwamu obwesige ku nsonga ezitaalimu na kulya nsimbi ya muwi wa musolo nga n’olwensonga eyo tayinza butassa mukono mu kiwandiiko kigoba bali banguzi.

Akulira oludda oluwabula Gavumenti mu Palamenti Joel Ssennyonyi agamba akasiimo tekandibadde kabi wabula kyandisoose kuleetebwa mu Palamenti nekikubaganyizibwako ebirowoozo, wabula obutaleetebwa kikifuula okuba obuli bwenguzi era naye ataddeko omukono okuggya obwesige mu ba Kkaminsona.

Eyaliko Kkaminsona mu Palamenti, Omubaka wa Munisipaali y’e Mityana Zzaake Francis ye akubye gudiikudde era asanyukidde entekateeka eno eyokugoba ba Kkaminsona ba Palamenti abeenyigira mu kulya enguzi okuyita mu nkola ey’okubaggyamu obwesige era naye yeegasse ku babaka abataddeko omukono.

Ekiriwo kati: Okuwaayo offiisi wamu n’okutuuza abaggya Inspector General of Police ne Deputy Inspector General of Police. Omukolo gguno gugenda mu maaso ku kitebe kya Uganda Police Force e Naguru. Omukolo gwetabiddwa Minisita avunaanyizibwa ku nsonga zomunda mu Gggwanga Hon. Maj. Gen. Kahinda Otafiire ne Minisita Omubeezi ow’ensonga zomunda mu Ggwanga Gen. David Muhoozi.

Omumyuuka w’omwogezi wa Kampala Metropolitan Police ASP Luke Owoyesigyire avuddeyo nategeeza nga Poliisi bweyakoze ekikwekweto oluvannyuma lwokutemezebwako nekwata abantu 15 abagambibwa okuba abamenyi b’amateeka mu Kira Division nga 27-May.
Poliisi yakutte abamenyi bamateeka lukulwe mu bitundu bya; Nsawo Zone, Kyaliwajala Ward, Namugongo Division, mu Disitulikiti y’e Wakiso.
Bano kuliko; Syino Michael, Katumba Ashraf alias Cobler (Muzzi wa misango lukulwe), Esere Hassan, Olowo Abeneko, Kasoma Emmanuel, Safari Yona, Bukenya Mudasiru, Mudu Salim, Sekandi Mustafa, Kikawa Stanley, Kabuye Ronald, Vumbi Enock, Nuwe John, Benjamin Ssali, Kyasanku Godfrey.
Bano basangiddwa n’ebiragalalagala wamu nebyuuma ebikozesebwa mu kumenya amayumba.

Omwogezi wa National Unity Platform Hon. Joel Ssenyonyi avuddeyo nategeeza nga Uganda Police Force wamu n’amaggye bwebabalemesezza okwolekera e Pallisa nga babasaliddeko ku lutindo lwa Ssezibwa ku luguudo lw’e Kayunga.
Ayongeddeko nti abakulira Poliisi babawandiikidde nga babayita mu lukiiko nabo ku bbalaza. Ono ategeezezza nti bajja kugendayo bongere okubannyonyola bategeere lwaki abalala bakirizibwa okutambula naye abakulembeze ba NUP tebakirizibwa.

Bannakibiina kya National Unity Platform Wanikina Fostine ne Mumbya Hussein olunaku lw’eggulo batwaliddwa mu Kkooti y’omulamuzi w’e Njeru. Okuwulira okusaba kwabwe okwokweyimirirwa kwayongezeddwayo okutuusa nga 6-June-2024 oluvannyuma lw’omulamuzi n’omuwaabi wa Gavumenti obutalabikako.