Pulezidenti Yoweri Kaguta Museveni olunaku olwaleero akwasiddwa ekifo ky’obwa Ssentebe bw’omukago gwa Non-Aligned Movement – NAM era nga ekifo kino wakukibeeramu okumala emyaka 3.
Pulezidenti Museveni adidde Pulezidenti wa Azerbaijan Ilham Aliye nga akiikiriddwa H.E Jeyhun Aziz Ogu Bayramov, Minisita avunaanyizibwa ku nsonga z’ebweru.

Omumyuuka w’omwogezi wa Uganda Police Force owa Kampala Metropolitan Police Luke Owoyesigyire avuddeyo nategeeza nga Poliisi y’e Katwe bwetandise okunoonyereza ku bubbi n’ettemu ebyabaddewo nya 18-January-2024 ku ssaawa kumi nabbiri ezolweggulo e Ndejje Kibutika mu Makindye Ssabagabo Municipality, mu Disitulikiti y’e Wakiso.
Okusinziira ku kunoonyereza okwakakolebwa kulaga nti abakozi ba Shana Distributors Ltd, Kikuubo, okuli; Galabuzi Haruna (Ddereeva), Babirye Patricia (Kitunzi), ne Mfitumukiza Henry (Mutikkuzi), balumbiddwa ababbi ababadde babagalidde emmundu bwebabadde batambuza ebintu nga bulijjo. Bano babalagidde okubawa ssente ekyavuddemu okulwanagana wakati w’abakozi n’ababbi. Ababbi bakubye Babirye Patricia essas mu kugulu, nebamutwalako ssente eziri eyo mu bukadde 20 ezabadde mu motora. Ababbi babadde batambulira ku piki piki nnamba UES 820K.
Bano bakubye enduulu era nabatandika okugoba ababbi bano abasudde piki piki okukakana nga abatuuze wamu n’aba booda booda e Namasuba bakutte ababbi bano. 2 ku bagambibwa okubeera ababbi bafiiriddewo olw’ebisago ate omulala nafa nga yakatuusibwa e Mulago.
2 ku bano bebategeerekeseeko nega kuliko; Bakka Mark ne Ssemanda Brain. Poliisi yasobodde okufuna emmundu gyebabadde bakozesa wabula ekyenaku ssente zebabadde babbye tezinazuulwa nga kirowoozebwa nti abantu abazze okugoba ababbi bebazitutte.

Abasirikale ba Uganda Police Force basanze obupiira bu kkalimpitawa ekika kya Kiss ne nnusu lukumi mu nsawo z’omusomesa John Senfuma eyabadde asendasenda omuyizi omuwala okwegatta naye. Ssenfuma bamukwatidde mu waabwe wa muwala mu nnyumba. Bwana Ssenfuma John kigambibwa nti musomesa ku ssomero lya Hillside College Mityana kigambibwa nti bazadde b’omuwala bakimanyaako nti asendasenda muwala waabwe mu by’omukwano nebamutega akatego bwatyo nagenda awaka yegatte n’omuwala ono ow’emyaka 16.

Abatuuze ku kyalo Rwenchwera, mu Nkoma Katalyeba Town Council mu Disitulikiti y’e Kamwenge bakeeredde mu kiyongobero oluvannyuma lwa Maama n’abaana be 3 okuttibwa muliranwa waabwe. Abatuuze bavudde mu mbeera nebatwalira amateeka mu ngalo okukkakana nga basse Sam Asiimwe agambibwa okutta Maama n’abaana be.

Pulezidenti wa Forum for Democratic Change ow’ekiwayi ky’e Katonga Erias Lukwago avuddeyo navumirira Bannabyabufuzi abavaayo nebalumba bannaabwe abali ku ludda oluvuganya Gavumenti, nategeeza nti kino tekibatwala mu maaso nakatono wabula ate bonna nga bwebali ku ludda oluvuganya balina kwegatta basobole okusindiikiriza Pulezidenti Yoweri Kaguta Museveni ave mu ntebe kubanga gwemulamwa gwabwe omukulu.