Abatuuze b’e Jinja-Misindye mu Goma Division e Mukono bakedde kwekalakaasa nga balaga obutali bumativu bwabwe oluvannyuma lwa mutuuze munaabwe nga muzimbi abadde atambulira ku Piki piki nnamba UDM 199B ngaweese omuntu okukubwa esasi mu kugulu nga bamulaga obutagoberera kiragiro kya Pulezidenti Yoweri Kaguta Museveni.Alex Oryem, yakubiddwa esasi mu kugulu okwa kkono ekiro kyajjo omusirikale ategeerekeseeko erya Gidudu nga musirikale ku Poliisi y’e Jinja-Misindye. Oryem asangiddwa ku ddwaliro lya Mukono General Hospital agamba nti abadde atwala mukwano ggwe Kasimu Ssebudde nga bagenda gyebazimba basobole okufuna akasente akasabola okubayisa mu kaseera kano akazibu.Ruth Kaweesa nga musawo ku ddwaliro e Mukono agamba nti Oryem wakulongosebwa kuba essasi lyasesebudde okugulu.

Poliisi e Mukono nabuli kati ekyatubidde n’ebimu ku bintu bya bantu abaafiira ku lyato abateeberezebwa okubeera 32 n’okusoba
Okusinziira ku a kulira okutereka ebizibiti ku poliisi e Mukono Afande Noah Ramathan ategeezezza Bukedde nti nabuli kati bakyalina mu sitoowa yabwe ebintu bingi omuli zi kaadi ez’enjawulo okuli zi driving permit, ennanga muntu, kaadi za bank ATM( kaadi z’amalwaliro, eza supermarkets , obufaananyi, ensawo, engatto, wallets, kaadi za mafuta, kaadi ez’ekikungu , ssaako n’ensimbi enkalu nga tewali muntu yenna yavuddeyo okujja kubinona.

Poliisi e Mukono ekutte omuwala ow’emyaka 19 ku bigambibwa nti yabadde mulukwe lw’okubba omwana ow’emyezi 10 nga bamubye ku Maama we mu Kikooza e Mukono. Ono abadde akola nga mukozi mu maka ga Olivia Nakabuye nga abadde yakakola enaku 3 mu maka gano.

Poliisi yakoze okunoonyereza n’ekwata Olivia Nandoyi nebamukwatira e Rwakaka ku boarder ya Uganda ne Kenya. Ono akuumirwa ku Poliisi ye Mukono nga bwalinda okutwalibwa mu Kkooti avunaanibwe

Police mu Disitulikiti y'e Mukono eri ku muyiggo gwa musajja agambibwa okukkira mukyala we n'amumiza omusu n'assaako kakokola tondeka nnyuma okuva ku kyalo Bugoba – Sseeta ekisangibwa mu Munisipaali y'e Mukono. 

Omusajja ono ategeerekeseeko lya Lubwama nga yakazibwako lya Musiraamu y'akkidde mukyala we Lydia Nabukeera myaka 26 n'amuserengesa ekalannamo. 

Police n'abatuuze mu kitundu kino bakyasobeddwa eka ne mu kibira kubanga batubidde n'omulambo gwa Nabukeera kubanga tebamanyi wadde wa luganda lwe yenna. Ofiisa wa Police avunaanyizibwa ku Kunoonyereza ku buzzi bw'emisango ku Mukono Central Police Station,  Ibrah Batasi akakasizza bino era n'ategeeza nti okuyigga Lubwama kugenda mu maaso ate omulambo gutwaliddwa mu ddwaliro e Mulago 

Ssemaka  akaabidde ku Police e Mukono oluvannyuma lw'eyali mukazi we okukamutema nga omwana gwe yamulekera nga wa myaka ebiri nti ssi yekitaawe n'asalawo okumugabira omusajja omulala gwe baayagalana naye nga bakyali mu ssomero.

Ibrahim Musisi nga mutunzi wa ngatto mu kibuga Mukono era nga mutuuze ku kyalo Butebe y'akabidde amaziga ku poliisi e Mukono oluvanyuma lwa eyali Mukazi we Patricia Birungi okumutegeeza nti omwana waabwe Leticia Kinconco myaka 11 gwe yamusuulira nga muto nga bwatali kitaawe bw'atyo n'asalawo okumuwa eyali muganzi we nga bakyasoma Fred Kisitu nti ye kitaawe.

Musisi ategeezezza nga omukazi ono bweyamusuulira omwana ono nga wa myaka ebiri bw'atyo n'asalawo okugenda okufumbirwa ewalala era nga y'abadde atoba n’omwana ono era nga kino kyamuwaliriza n’okwesonyiwa eby'abakazi n'asalawo okukuza omwana we.

Ono agenze mu maaso n'ategeeza nti nga 20 Ntenvu w'omwaka oguwedde, Birungi n'anona omwana ono okugenda okulya ssekukkulu n'amutegeeza nga bweyali agenda okumukomyawo mu bwangu wabula bweyalabye tamukomyawo kwe kumukubira essimu era  wano weyakamutemedde nti omwana ssi wuwe nga yabadde amuwaddeyo ewa kitaawe.

Entiisa ebuutikidde abatuuze enkya ya leero ku mwalo gw'e Nabulugo e Katosi mu ggombolola y'e Ntenjeru ekisangibwa mu Disitulikiti y'e Mukono oluvannyuma lw'okusanga mutuuze munnaabwe Steven Ssemwogerere ng'attiddwa.

Omulambo gwa Ssemwogerere gusangiddwa mu kitaba ky'omusaayi enkya ya leero ku mwalo okuliraana ebbajjiro lye w'abadde awenjeza ekigulira magala eddiba .

Akulira okunoonyereza ku buzzi bw'emisango e Mukono, OC CID Ibrah Batasi akakasizza bino era n'ategeeza anti okunoonyereza kugenda mu maaso wabula gwo omulambo gwa Ssemwogerere gutwaliddwa mu ddwaliro ly'e Kawolo gwongere okwekebejjebwa !!
 

Minisita owa guno naguli Hajji Abdul Nadduli asimattuse okugajambulwa abakulembeze b'ekibiina kya NRM abaayitiddwa okuva mu Disitulikiti y'e Mukono yonna oluvannyuma lw'okubasuubiza okubawa ensako ey'e mitwalo esatu esatu zebagambye nti ntono nnyo era nga tezibamala, batanudde okuwogganira waggulu ekiwalirizza ssentebe w'e kibiina mu Disitulikiti Hajji Ssebagala Twahili okuyita Nadduli annyonnyole abantu bano ekituufu.

Wabula Nadduli olukute akazindaalo avumye buvumi bakulembeze bano omubadde ba Ssentebe b'amagombolola, ba kkansala ba Disitulikiti wamu n'abesimbawo ko mu Mukono ku bbendera y'ekibiina kya NRN  nebagwa olwo nebamukasukira obukyupa bw'amazzi okukkakana nga abaserikale bamuddusiza. 

Olwo abakulembeze bano batandise okumuweereza  ebisongovu nga kwotadde n'okumulangira  okweyagaliza yekka mbu yalemera n'okuzzaayo emmotoka ya Disitulikiti , nebamugoba e Mukono obutadda. 

Ssaabalabirizi w’ekkanisa ya Yuganda, The Right Rev. Stanely Ntagali era nga y’akulira olukiiko olukulu olwa Uganda Christian University e Mukono agugumbudde Gavumenti olw’okuwanika emisolo gyeggya ku matendekero g’obwannannyini naye ate nga amatendekero gano gaba gatuusa empeereza yaago eri Bannayuganda nga era aga Gavumenti bwegakola.

Ssaabalabirizi okwogera bino abadde ki mukolo gw’okutikkira abayizi abaweredde ddala 1136 ku UCU e Mukono.

Wabula Ntagali waayogeredde bino nga Munisipaali y’e Mukono yatwala dda ettendekero lino erya UCU  mu kkooti lwa butasasula musolo okumala ebbanga lya myaka esatu.

Omulamuzi wa kkooti enkulu e Mukono Margaret Mutonyi aliko omuvubuka gwasindise mu nkomyo e Luzira akulunguleyo emyaka 30 oluvannyuma lw’omusango gw’okusaddaaka mukulu we afune obugagga okumukka mu vvi. 

Abdul Kawere ow’emyaka 19 omutuuze mu ggombolola y’e Busukuma mu Disitulikiti y’e Wakiso ng’akola gwa lejjalejja y’akaligiddwa ku kibonerezo ekyo.

Oluuyi oluwaabi nga lukulembeddwamu omuwaabi wa Gavumenti Mallen Obizu, ategeezezzza kkooti nti Kawere yasaddaaka muganda wwe Ibrah Mbalangu ow’emyaka 24 mu 2015 bweyeekobaana ne mukulu we omulala Khalidah Ndidde wamu n’omusawo w’ekinnansi Abdul Ssenfuma.

Obizu ategeezezza nti Kawere yakubira mukulu we Mbalangu essimu ajje abeegatteko ye ne muganda we Ndidde  ssaako ne Ssenfuma babeeko negyebalaga era nebeesisinkana e Bweyogerere nebavuuga emmotoka okutuuka e Nakagere ku mugga Lwajjali ogusangibwa mu ggombolola y’e Ggoma mu Disitulikiti y’e Mukono nti awo Ssenfuma bweyabalagira bakutame banaabe ,  Kawere n’asindika Mbalangu mu mugga n’afa. Ate ye Ssenfuma omusawo w’ekinnansi yeesuula mu mmotoka n’afa ku lunaku lwebaakwatibwa.