Ssentebe w’eggombolola atuuyanye bwezikala mu Lukiiko nga bamulumiriza okubba ettaka

Ssentebe w’eggombolola atuuyanye bwezikala nga n’endala azisaza bibatu mu lukiiko lw’ekyalo olubadde lutuuziddwa nga abatuuze bamulumiriza obutemu ssaako n’okwekomya ekibanja kya ba mulekwa nga kwogasse  n’okubasiba mu kkomera.

Mukiiza Lauben Ssentebe w’eggombolola y’e Butoloogo y’azisazizza ebibatu mu lukiiko oluyitiddwa RDC wa Mubende Florence Beyunga olutudde ku kyalo Kannyogoga ekiri mu ggombolola y’e Butoloogo, okusobola okugonjoola obutakkaanya obuli wakati wa Ssentebe w’eggombolola ssaako n’abatuuze mwebasinzidde nebategeeza RDC nga ssentebe bweyabba ekibanja kya ba mulekwa oluvannyuma n’abasiba mu kkomera nga yeeyambisa Police y’e Butoloogo.

Ekibanja Kyebalumiriza Ssentebe okubba kya mugenzi omwami n’omukyala Mbonabukye Batista ne Venasia Nyinabuseruka nga kino Ssentebe yakyekomya ng’ayambibwako n’abamu ku bali mu bifo by’ebyobufuzi nga kati baakimalawo kyonna ne bamulekwa tebalina waakubeera ate bwebaamugambako n’abassa mu nkomyo.

RDC Florence Beyunga aweze nga bw’agenda okununula ekibanja kino.