Waliwo ssemaka mu Disitulukiti y’e Lyantonde atirimbudde abantu basatu omuli mukyala we, omwana  wamu ne nazzaala we era emirambo n’agisibira mu nju n’amalamu omusulo.

Enjega eno egudde ku kyalo Mitukula ekisangibwa mu muluka gw’e Kagara mu Ggombolola y’e Kanshagara mu disitulikiti y’e Lyantonde nga omusajja Ngendaimaana Innocent ow’emyaka 60 yasse mukyala we Naitasha Kanyanduke, omwana Nzirimaana Alifunsi wamu ne omukadde omuzaalira omukyala etegeerekeseeko erya Oliva.

Ssentebe w’ekyalo kino Mitukula, Yusuf Kadere ategeezezza Luboggola Simba nti enjega eno okumanyika yazuuliddwa omutuuze Jackson  Byamukama eyalinnye waggulu n’aseruukulula enju oluvannyuma lw’okumala ennaku ttaano nga abantu bano tebakubikako kimunye era oluvannyuma lwa kino eriiso yalikubye ku mirambo .

Wabula kiteeberezebwa nti bano (Abagenzi) Ngendaimaana yabakubye kakumbi ku mitwe oluvannyuma lw’okusanga ebiwundu ku mitwe gyabwe. Police eggyeewo emirambo n’egitwala mu ggwanika ly’eddwaliro ly’e Lyantonde nga bwekola okunoonyereza.