Omusajja mu Disitulikiti y’e Mpigi yeeyimbemu ogwa Kabugu oluvannyuma lwa Mukyalawe n’abaana okumulemesa okutunda ku ttaka okuli amaka gaabwe asobole okusasula mulirwana abadde amubanja.
Omusasi waffe mu Disitulikiti y’e Mpigi, Aloysius Ssengendo yaatutegeezezza nti David Kasozi ow’emyaka 65 omutuuze ku kyalo Buwanda ekisangibwa mu ggombolola y’e Buwama yeeyeggye mu bulamu bwensi eno nga gyebuvuddeko yali yaguza mulirwana we ettaka eryazuulibwa oluvannyuma nti lyali lya kitongole ekivunaanyizibwa ku by’ebibira mu ggwanga ekya (National Forestry Authority) era nekiryeddiza.
Nabwekityo mulirwana wa Kasozi gweyaguza ettaka liri abadde amubeeba entakera amuddize zzente nga era kigambibwa nti Kasozi kati omugenzi abadde agezaako okunnyonnyola ab’amaka ge batundeko ku ttaka basasule ebbanja naye ng’akootakoota mu ga lumonde.