Ssabakristu w’ekigo ky’oku ssaza e Masaka amaaso gamumyukidde mu lukiiko lw’ekyalo olutudde ku kyalo Kirumba B mu ggombolola y’e Katwe – Butego ng’abatuuze bamulumiriza okubagobaganya ku bibanja byabwe bye bagamba nti tabirinako kakwate.
Abatuuze bano nga bakulembeddwamu ssentebe waabwe, Rose Ssanyu Nabukeera balumiriza Ddibya okukozesa olukujjukujju n’ekigendererwa ky’okubagobaganya ku bibanja byabwe bye beegulira ku ssente zaabwe.
Bano era balumiriza poliisi okutiitiibyanga Ddibya nga buli lwe batwalayo ensonga zaabwe tezikolebwako ekiviiriddeko Ddibya okubaliisa akakanja buli lukya.
Olukiiko luno lubadde lukubirizibwa omumyuka w’omubaka wa Pulezidenti e Masaka, Joseph Ssekasamba, alagidde poliisi okusooka okulinda okussa ebiragiro bya kkooti mu nkola okutuusa nga waliwo ebimaze okugonjoolwa ku nsonga eno.
