Ssaabawaabi wa Gavumenti Mike Chibita aggye enta mu misango gy'obutemu, Obubbi n'okubuzaawo omuntu egibadde givunaanibwa Aaron Baguma eyali aduumira Police ya Kampala – CPS .
Ekiwandiiko ekiraga nti Ssaabawaabi omisango agiggyemu enta kireeteddwa omuwolereza wa Gavumenti Alex Ojok mu maaso g'omulamuzi wa kkooti enkulu mu Kampala, Flavia Ssenoga wabula ebbaluwa teraga nsonga yonna lwaki Ssaabawaabi wa Gavumenti omusango aguggyyemu enta okuggyako alaze nti etteeka limuwa omwagaanya okukola ekyo.
Olwaleero Baguma ne banne omuli omusuubuzi w'emmotoka mu Kampala owa Pine, Ssebuufu babadde balina okubaako kyebaanukula ku kubuzaawo n'okutemula omukyala omusuubuzi mu Kampala Donah Betty Katushabe eyattibwa mu Mukulukusabitungotungo wa 2015 olw'okulemererwa okusasula obukadde mwenda ezaali zimubanjibwa ku mmotoka gyeyagula ku Pine .
Wabula ab'oluganda lwa Katushabe ekya Ssaabawaabi kibakubye wala era nebalayira okweyongerayo n'omusango guno okutuusa nga baliyiriddwa.