Ssaabasajja Kabaka Ronald Muwenda Mutebi II yalambudde obutaka bw’ebika okuli; Ennyonyi Endiisa e Mukungwe, Namungoona e Kasaka, n’e Kinyomo e Kyasa mu Gombolola ye Kyanamukaaka.
Mu bubaka obw’enjawulo Beene bweyasibiridde abantube, Kabaka yalaze obukulu bwa Bajjajja Abataka nagamba nti Abataka Abakulu b’obusolya gwemusingi gw’Obuganda, ssi basamize. Abo abagezaako okukkirizisa abantu nti basamize , ensonga baba tebazitegedde bulungi. Abataka ba kitiibwa, bebakuuma ennono nobulombolombo bwaffe, era njagala abaana abato bave ku mukolo guno nga bategekedde nti Abakulu b’ebika bebantu bebalina okussaamu ekitiibwa.
Omutanda yasanyukidde eky’abaana abato abazze mu bungi okumwaniriza naategeeza nti abaana abato bwebabeerawo ku mukolo bavaawo bebuuza amakulu g’emikolo nga gino era mudda baliba bajjukira amakulu gaajo.